Tan De'it Bainaka, Sulan Povu Hanesan Animál Featured

Populasaun Madohi Protesta Governu. Populasaun Madohi Protesta Governu. Foto TempoTimor.com

Tempotimor (Díli) – Komunidade aldeia tolu (3) Suku Madohi, ne'ebé hela besik Aeroportu Internasionál Nicolau Lobato, lamenta ho hahalok parte Administrasaun Navigasaun Aero Timor-Leste (ANATIL), ne'ebé taka dalan ba área aldeia tolu ne'e, ligasaun ho loron boot Konsulta Populár, Sesta (30/08/19).

Populasaun Suku Madohi Protesta Hasoru Governu. Video Figo.

"Ami komunidade Suku Madohi, kompostu husi Aldeia Rosario, Aldeia 7 Dezembru no Aldeia Anin Fuik, halo ona karta aberta ne'ebé hetan asinadu husi kada uma kain ida-idak. Karta ne'e dirije ba ANATL, Ajensia Dezenvolvimentu Nasionál (ADN) inklui autoridade lokál sira, para labele sulan ami povu hanesan animal," dehan Portavoz komunidade Suku Madohi, Terezinha José Maria ba Tempotimor.com, Segunda (19/08/19).

Nia dehan, komunidade aldeia tolu haruka ona karta protesta iha loron 13 Jullu 2019 ba ANATL, Ajensia Dezenvolvimentu Nasional (ADN) no autoridade lokál. Maibé, tuir Terezinha, seidauk iha resposta.

Entretantu lia na'in husi Aldeia Anin Fuik, Julião Guterres dehan, bainhira ANATL ba halo moru iha fatin refere, komunidade balun husu ba ANATL atu loke mós portál para bele fasilita komunidade ne'ebé tama sai área ne'e. Maibé, tuir Julião, to'o agora laiha dalan ba komunidade.

"Ha'u uluk kedas preokupa, to'o ami husi ANATL no ADN atu loke dalan ba komunidade sira, maibé ANATL no ADN duun malu to'o laiha solusaun,” nia hateten.

Preokupasaun seluk, tuir Julião, karik ema ruma moras ka inan feton balun ne'ebé atu partus karik, nia dehan, pasiensia sira tenke hulan ka kous de'it ba to'o iha ró tunda, para bele sa'e karreta," hatete lia na’in ne'e.

Komunidade sira informa katak, iha 19 Agostu dadeersan, ANATL no ADN lori forsa no Polísia kompleitu, hodi asegura kompañia ne'ebé halo projeitu refere. No ANATL ameasa komunidade sira katak Maun boot Xanana Gusmao mak Haruka taka portaun ba komunidade sira. Projeitu ne'e konstrui husi Timor Block Building (TBB).

Komunidade sira ne'ebé hela iha área aldeia tolu (3) ne'e kuaze uma kain 80-resin, inklui komunidade sira nia transporte ne'ebé iha, labele sai ba estrada boot. Nune'e mós sira ne'ebé para iha estrada boot, labele tama ba komunidade sira nia uma. T anba, agora dalan laiha dalan.

Bainhira Tempotimor.com konfirma ho ANATL, relasiona ho komunidade nia preokupasaun, ANATL lakohi fó komentariu ba asuntu refere.

Rate this item
(0 votes)
Last modified on Monday, 19 August 2019 15:29
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com