“Iha sesaun lejislativa ba da-tolu ne’ebé foin remata ne’e, Prezidente Parlamentu Nasionál sei aprezenta ba Povu liuhusi reprezentante sira iha Orgaun Soberania ida ne’e, relatóriu annual kona-ba produtividade, lala’ok no dezafiu sira nebe Parlamentu Nasionál hasoru, ne’ebé sei fahe ba distinto Deputadu sira iha tempu badak”, dehan Vise Prezidente Parlamentu Nasionál (PN), Maria Angelina Sarmento, iha plenária PN, kuarta (15/09).

Maibé Parlamentu Nasionál rekonhese relatóriu ne’e seidauk aprezenta ho forma ida ideal, tanba seidauk hetan relatóriu anterior ruma ne’ebé sai nu’udar referénsia. Maibé ho kontribuisaun husi deputadu sira, hamutuk hodi hadi’ak liután relatóriu sira tuir mai.

“Ha’u informa jerál de’it katak Parlamentu Nasionál rejista produtividade ida ne’ebé as no hasoru dezafiu boot lubuk ida interna iha orgaun reprezentativu ida ne’e no iha Estadu tomak nebe hatudu orgullu husi parte ida no kontesta kapasidade no vontade politika deputadu sira husi parte seluk”, afirma nia.

Nu’udar Órgaun Soberanu daruak ne’ebé haktuir ba mandatu Konstitusionál, kona-ba halo lejislasaun nian, mak Parlamentu Nasionál hakarak hatudu produtividade as hodi aprova lei sira importante lubuk ida husi Komisaun Espesializada Permanente sira durante sesaun Lejislativa ida ne’e, inklui mós durante periode resesu.

Enkuantu sorin seluk, mak halo fiskalizasaun nian, hasoru dezafiu lubuk ida tanba ho pandemia Covid-19 ladun fó biban di’ak ba Deputados sira atu hala’o kna’ar ida ne’e iha terrenu no halo sirkulasaun ba Munisípiu to’o Posto sira, hodi haree implementasaun programa no orsamentu iha setór oioin.

Tanba ne’e iha sesaun lejislativa liu ba, Parlamentu Nasionál mós lakon nia ema ida, Deputadu Saudozu Sabino Soares “Guntur” husi Partido Libertação Popular (PLP) inkui funsionáriu Parlamentu Nsaionál, Juvenal Fraga no ikus liu Asessor Internasionál Pedro Andrade, no lubuk ida mak sofre moras ka infetadu ho SARS-COV-2 ka COVID 19.

Ho situasaun ida ne’e fó hanoin ba ema hotu, maske hala’o funsaun polítika ho aproximasaun no karater oioin, maibé hothotu vulnerável ba vida saudável iha periodu pandémiku COVID-19 ne’ebé dezafia moris iha aspetu oioin no moras seluk ne’ebé bele ataka ema liuhusi ida-idak nia komprtamentu moris no hanoin ne’ebé deskontroladu.

Ho ida ne’e, iha sesaun Legislativa da-haat to’o fulan-dezembru hein katak Parlamentu Nasionál sei fó prioridade ba lei hirak ne’ebé mak iha prosesu debate no finalizasaun hanesan Lei Enkuadramentu Orsamentál, Lejislasaun iha área Justisa hanesan organizasaun judisiária, estatutu Ministériu Públiku no Majistradu Judisiál no Lejislasaun ba Poder Lokál.

“Hein katak ba oin ita hotu komprometidu ba Parlamentu Nasionál ne’ebé saudável, étiku no dignu”, dehan nia. (*)