Print this page

CNRT Akuza Aniceto ‘Privatiza’ Parlamentu Nasionál

By September 15, 2021 1236
Bandeira Partidu Congresso Nacional de Reconstrução de Timor (CNRT). Bandeira Partidu Congresso Nacional de Reconstrução de Timor (CNRT). Foto Suplay

Tempotimor (Dili)-Deputada Bankada Congresso Nacional de Reconstrução de Timor (CNRT), Verginha Ana Belo, akuza  Prezidente Parlamentu Nasionál (PN), Aniceto Longuinhos Guterrea Lopes, privatiza Parlamentu Nasionál, no uza hanesan kompaña privadu tanba la autoriza Vise Prezidente PN, Maria Angelina Sarmento organiza sesaun solene iha prosesu lejislativa da-haat.

"Hanesan fali órgaun estadu (Parlamentu Nasionál) ida ne’e kompaña limitada proprietáriu Deputadu Aniceto Guterres nian”, deklara nia iha Parlamentu Nasionál (PN) kuarta (15/09).

Tuir lolos abertura kuarta sesaun lejizlativa ne’e, tenke hala'o liuhusi sesaun solene hanesan tinan sira liubá, maibé la sai realidade tanba Prezidente Parlamentu Nasionál, Aniceto Guterres privatiza tiha órgaun estadu ida-ne’e hodi la fó delegasaun kompeténsia ba Vise Prezidente Parlamentu atu organiza sesaun solene.

Iha situasaun ne'e, Bankada CNRT lamenta tanba sesaun solene ba loron kuarta (15/09) ne’e labele halo ho razaun katak Prezidente Parlamentu la fó delegasaun kompeténsia ba Vise Prezidente Parlamentu.

To'o oras ne'e deputadu sira sei lembra hela ba problema ne'ebé mosu iha loron 19 Maiu 2020, maske laiha delegasaun kompeténsia maibé Vise Prezidente parlamentu obriga-án dirije plenária hodi halo asaltu podér no sobu kompozisaun meza parlamentu nian.

"Afinál, rejimentu parlamentu no lei organizasaun funsionamentu administrasaun parlamentu ka LOFAP vale iha situasaun ne’ebé ita mak kaer ona kompozisaun meza, maine lei sira ne’e laiha valór bainhira la’ós ita mak lidera meza”, dehan nia.

Maske nune'e, Bankada CNRT fiar katak prátika ne’ebé la normál tanba Prezidente PN laiha ona sensibilidade umanu ba povu ne’ebé oras ne’e terus hela.

Tanba rezolusaun Governu kona-ba konfinamentu jerál  bandu povu iha sidade hakmatek maibé Prezidente PN, Aniceto Guterres semo fali ba rai li’ur, no pior liur nia rasik la delega hela nia kompeténsia ba nia vise prezidente. (*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items