"Tristeza boot bainhira ita hare’e iha ita nia rai laran sei iha refujiadu, família barak sei hela iha tenda ka lona IDPs nian”, dehan Deputada CNRT, Vergina Ana Belo, liuhusi abetura sesaun lejislativa da-haat iha plenária PN, kuarta (15/09).
Tanba, Orsamentu Jerál Estadu 2021 ho vaóor Billaun US$2 ne'ebé aprova husi Parlamentu Nasionál montante boot tebes, maibé tanbasá labele rezolve problema komunidade refujiadu sira-nian.
"Tanbasá mak ho orsamentu ne’ebé boot tebes ne’e seidauk hadi’ak infraestrutura bázika sira ne’ebé hetan estragu iha loron 4 Abril 2021 liubá?. Tanbasá mak ho orsamentu ne’ebé boot tebes maibé ita-nia povu sei hakilar nafatin falta nesesidade bázika hanesan bee-moos no eletrisidade?", hatete nia.
Maske Governu konsege asesu ba osan iha tinan-rua hamutuk Billaun US$3.5 maibé povu iha área rurál balun dada rasik eletrisidade no ké rasik estrada?. Tanbasá mak povu iha kapitál Díli, inklui joven sira hakilar ba kampu traballu.
"Governu de Faktu kaer hela xáve ba osan Billaun US$3.5 nian?. Keta dala ruma situasaun sira ne’e nu’udar konsekuénsias negativu, malisan husi ukun ne’ebé la tuir Konstituisaun?. Maluk sira, karik ita presiza halo reflesaun ba situasaun no realidade ida-ne’e”, dehan nia.
Deputadu bankada Partidu Demokratiku (PD), Adriano do Nacimento, hatete tuir perspetiva politika bankada PD nian haree katak, povu no nasaun ida ne'e enfrenta hela problema fundamental tolu, hanesan Problema líder no lideransa da nasaun.
Tanba, líder politiku sira hatur nia interesse pesoál no grupu, ás liu interesse povu no nasaun. Faktu hatudu katak, líder polítiku sira satan malu no hatun malu, tamba interesse poder polítiku, hodi ignora diálogu nasionál, rekonsiliasaun nasionál no konsertasaun polítika, atu hatur dezenvolvimentu nasionál ne’ebé dignifica povu no nasaun.
Infelizmente aktu polítiku hirak ne’e, mak hamosu inserteza polítika, hamihis konfiansa no esperansa povu no komunidade internasionál.
Tamba ne’e, mak Timor-Leste monu ba resesaun ekonómika, ne’ebé hatudu indikasaun katak, ekonomia Timor-Leste iha tinan 2020, monu ba 7%, siknifika GDP nasaun nian, monu at liuba atije 7.3%, no todan atu hamrik ka rekupera iha tempu badak, despeza públiku monu ba 9 % no hamonu mós setór interligadu sira seluk.
Kestaun ba daruak mak Covid-19 no siklone seroja ne'ebé akontese iha Abril 2021, hamosu dizastre umana hodi hamate povu, harahun infraestrutura públika, paraliza no hamate aktividade ekonómika no finanseira no seluk tan.
Aleinde kestaun ba datoluk mak Insertesa polítika atu define no dezenvolve reseita alternativa, liliu inserteza politika atu dezenvolve gas iha kampu greater Sunrise, hodi substitui reseita no produsaun gas husi kampu Bayu Undan, nebé menus ba bebeik hosi fulan ida ba fulan seluk.
Tanba Inserteza polítika atu dezenvolve setór privadu no kooperativa, nu’udar pilar ba dezenvolvimentu ekonomia da nasaun, hodi tane no hametin setor públiku iha nasaun ne’e. (*)
