"Ami foin haree hetan de'it karreta ambulánsia mai tula ema moras mós ami tauk hodi subar, tanba ami hanoin ida ne'e doutor ne'ebé atu mai fó vasina ami, maibé ohin prezensa MAPKomS nia ne'e ami orgullu no agradese tebes, tanba primeira vez ukun nain mai hodi enkoraja ami atu simu vasina no esplika benefisiu husi vasina”, hatete Reprezentante Komunidade, Domingas dos Santos iha Aldeia Quirilelo, tersa(14/09).
Komunidade kompremetidu ona sei muda hanoin tauk hodi kolabora ho Governu liuhusi Ministériu Saúde, atu simu vasina hodi bele kombate pandemia covid-19 iha Timor-Leste
Reprezentante Joventude Aldeia Quirilelo, Luis da Costa hatete, Suku Quirilelo ne'e iha liu área rurál nune'e la asesu informasaun oinsá atu luta hasoru pandemia Covid-19.
Ho ida ne’e husu ba agradese ba MAPKomS tanba bele lori ona informasaun lolos mai hodi harahun hanoin tauk ne'ebé durante ne'e sira iha.
"Ida ne'e mak ami povu presiza, ami hakarak líder sira hakbesik ami atu fó informasaun lolos mai ami, tanba durante ne'e ami tauk tebes ho informasaun balun husi maluk seluk katak vasina sira ne'e aat, maibé sorumutu ida ne'e, ha'u reprezentante joven Aldeia Quirilelo agradese tebes ba prezensa MAPKomS hodi mai lansa ona lialos ba ami iha loron ohin, no haforsa ami-nia vontade atu simu vasina”, dehan nia.
Ministru Asuntu Parlamentar no Komunikasaun Sosiál (MAPKomS), Francisco Martins Jerónimo, enkoraja nafatin komunidade Suku Liurai tomak atu kolabora ho autóridade lokál, nune'e sira bele kolabora liután ho MS hodi bele kontribui ba nasaun Timor-Leste,atu luta hasoru pandemia Covid-19.
"Husu atu lalika laran taridu ba informasaun boatus sira, maibé koko atu kolabora ho imi-nia líder komunitária sira atu nune'e sira bele halo Kolaborasaun liután ho MS nune'e imi bele simu vasina, tanba ita-boot sira-nia partisipasaun iha vasina mak bele hatudu Timor-Leste sei livre husi Covid-19", afirma nia.
Tanba laiha Governu ida mak atu hanoin aat ba nia povu, maibé Governu nia hakrak mak povu labele sai hanesan nasaun avansadu sira hodi mate barak tanba pandemia Covid-19. (*)
