Tanba Movimentu Tane RDTL haree ba situasaun atual iha Timor-Leste relasiona ho politika Governu nian laiha konsisténsia hodi fó serteza ba prevene sirkulasaun pandemia Covid-19 no variante Delta.
“Mota RDTL ezíje ba Governu tenke hakotu ona Konfinamentu Obrigatóriu (KO) iha Timor-Leste hodi fó liberdade totál ba povu no joventude sira hotu hodi buka ninia moris ba hakotu krize ekonómia ne'ebé mak dadaun família enfrenta hela", dehan Portavóz Mota RDTL, Bento Alberto Carlos, iha Uma tradisional (uma-Adat), Tasitolu, Dili, sesta (10/09).
Maske Mota RDTL hatene aplikasaun konfinamentu atu evita sirkulasaun vírus, maibé iha prátika Governu halo diskriminasaun, tanba realidade membru orgaun soberanu sira halo viajen ba estranjeiru.
"Governu hala'o diskriminasaun boot, hanesan realidade Prezidente Parlamentu Nasionál (PN), Aniceto Longuinhos Guterres Lopez, ho nia ekipa ba nasaun Áustria, maibé sulan hela povu iha uma.
Governu laiha responsábilidade ba nia povu", hatete nia.
Aleinde ne'e, Hovernu laiha politika estratéjiku ne'ebé adekuadu hodi asegura nia povu husi krize ekonómia ne'ebé enfrenta.
Durante ne'e, membru Governu konsentra de'it ba Pandemia Covid-19, ho Variante Deta, hodi husik no abandona asuntu seluk ne'ebé importante no prioridade ba nesesidade povu nian.
Maibé, husu ba sidadaun hotu atu kumpri nafatin regulamentu husi Organizasaun Mundiál Saúde (OMS) nian iha Timor-Leste.
"Husu ba povu Timor-Leste kontinua movimentu ba, hodi rezolve rasik problema ekonómia ne'ebé ita-boot sira rasik enfrenta, mezmu Governu laiha ona politika ida di'ak hodi asegura moris família ida-idak nian", hatete nia. (*)