PR Tenta Trava Vigorasaun FM Featured

Prezidente da Republika Dr. Francisco Guterres Lu Olo hamnasa wainhira enkontru ho Primeiru Ministru Taur Matan Ruak iha Palasiu PR, (15/08) Prezidente da Republika Dr. Francisco Guterres Lu Olo hamnasa wainhira enkontru ho Primeiru Ministru Taur Matan Ruak iha Palasiu PR, (15/08) Foto Midia PR
Tempotimor (Díli) – Ikus ne'e, mosu perspetiva iha komunidade leet katak Prezidente Repúblika (PR), Francisco Guterres Lú Olo tenta atu trava seremonia troka nota diplomasia kona-ba tratadu foun Fronteira Maritima (FM) entre Timor-Leste ho Austrália ne'ebé medita sei halo iha loron 30 Agusto 2019.
 
Perspetiva ne'e mosu, bainhira Prezidente Repúblika iha loron hirak liubá, haruka tan ba Tribunál Rekursu (TR) Lei Fundu Petroliferu (LFP) no Lei Atividade Petrolifera (LAP). Prezidente Repúblika ho ninia kompetensia ne'ebé iha, husu ba Tribunál Rekursu atu halo fiskalizasaun preventive ba lei rua ne'e.
 
Antes ne’e, PR husu ba Tribunál Rekursu hodi halo fiskalizasaun preventiva ba Dekretu Parlamentu Nasionál Número 6/V (Primeira Alterasaun Lei Número 3/2014, 18 Juñu) kona-ba Lei Rejiaun Administrativa Espesiál Oe-Kusi Ambeno (RAEOA). Maibé, ikus mai TR deklara lei ne’e  konstitusionál. La’ós inkonstitusional. 
 
Kona-ba kestaun ne’e, Prezidente Bankada Partidu CNRT, Duarte Nunes hatete saida mak PR halo ne’e lei fó dalan. Maibé, haree ba durasaun tempu ne’e mak difisil uitoan. 
 
“Depende ba konsiensia lider ida-idak ninian. Prezidente nu’udar ema veteranu ida. Ne’ebé nia iha konsiensia di’ak kona-ba lei hirak ne’e,” hatete deputadu Duarte via telemovel ba tempotimor.com, Sesta (16/08/19).  
 
Duarte hatutan, maski PR haruka ona lei rua ne’e ba Tribunál Rekursu, maibé PR nia tempu atu deside ne’e durante loron 30 nia laran de’it. Dalaruma entre 25 Agostu tinan ida ne’e Prezidente tenke foti ona desizaun. “Ha’u rona informasaun katak Prezidente Repúblika haruka lei rua de’it ba TR. Lei rua ne’e mak Lei Fundo Petroliferu no Lei Atividade Petroliferu,” Duarte esplika. 
 
Iha parte seluk, observadór polítika hosi Universidade Nasionál Timor Lorosa’e (UNTL), Camilo Ximenes identifika pontu rua mak provoka PR haruka lei rua ne’e ba Tribunál  Rekursu. 
 
Pontu dahuluk, tuir Camilo, dalaruma PR sente dúvida ho lei rua ne’e mak nia husu ba TR atu halo fiskalizasaun preventiva. “Pontu daruak mak, dalaruma kapasidade asesór juridika sira iha gabinete PR nian mak mukit uitoan, mak halo PR foti desizaun hodi haruka lei rua ne’e ba nafatin TR,” Camilo hatete.   
 
Komunidade Becora, Postu Administrasaun Cristo Rei, Salustiano M da Costa (38) husu ba Prezidente Repúblika atu labele veta lei kona-ba fronteira marítima. Salustiano mós husu ba Prezidente Repúblika bele hola desizaun ho ulun malirin.
 
“Ha'u hanoin Prezidente Repúblika nia kompetensia atu veta lei ida. Maibé, triste boot bainhira PR veta filafali Lei kona-ba Fronteira Marítima. Prezidente nu'udar veteranus ida ne'ebé luta makaas ba independensia TL, la devia trava vitoria ne'ebé maun boot Xanana lori ba Timor-Leste,” nia dehan.
 
Tuir Salustiano, sei karik Prezidente Repúblika halo ida ne'e, mak Austrália dada an filafali, bainhira loos mak ita iha fali fronteira marítima. “Hanesan povu, ha'u husu Prezidente Repúblika atu hola desizaun ho ulun malirin. Tanba ida ne'e kona-ba soberania nasaun Timor-Leste nian,” Salustiano husu.
 
Informasuan seluk ne'ebé Tempotimor.com asesu hatete, estadu TL selu ona juristas lubuk ida ne'ebé ho kualidade di'ak, hodi apoiu susesu ekipa negosiadór ba fronteira marítima. 
 
Hanesan publiku hotu hatene, durante Governu AMP nia ukun, lei lubuk ona mak Prezidente Repúblika Lú-Olo husu para halo fiskalizasaun abstrata ho fiskalizasaun preventiva ba Tribunál Rekursu. Maibé, Tribunál Rekursu sempre konsidera lei hirak ne'e la viola konstitusaun.
Rate this item
(1 Vote)
Last modified on Friday, 16 August 2019 21:43
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com