"Mantein impozisaun serka sanitária iha Munisípiu Baukau, Ermera Dili, no Covalima, to’o loron 22 fulan-setembru tinan 2021", dehan Ministru Prezidensia Konsellu Ministru, Fidélis Leite Magalhães iha , Aitarak Laran, kuarta (08/09).
Maibé deside kore komunidade sira iha Suku Naimeko no Bobometo, Postu Pante Makassar no Oesilu, Oekussi husi serka Sanitária.
"Hakotu impozisaun serka sanitária iha área sira ne’ebé abranja husi suku Naimeko, postu administrativu Pante Makassar, no husi suku Bobometo, postu administrativu Oesilu, suku rua ne’e iha Rejiaun Administrativa Espesiál Oekussi Ambenu nian, to’o tuku 23:59, husi loron 8 fulan-setembru tinan 2021", informa nia.
Impozisaun serka sanitária iha Munisípiu Manufahi, ne’ebé vigora to’o loron 15 fulan-setembru tinan 2021, laiha alterasaun.
Iha ne'e, bandu nafatin tama no sai husi munisípiu Baukau, Covalima, Dili, Ermera no Manufahi, exetu tanba razaun sira seguransa públika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu hala’o ba interese públiku nian.
Proibisaun ida-ne’e la abranje ba indivíduu sira ne’ebé komprova ona vasinasaun kompleta (doze rua) kontra Covid-19 nian, nune’e mós ba labarik sira iha tinan neen mai-kraik ne’ebé akompaña indivídu sira ne’e. (*)
