Tempotimor (Díli) – Hela de'it Loron 15 tan, seremonia troka nota diplomasia entre Timor-Leste ho Austrália sei realiza. Komisáriu Joint Petroleum Development Area (JPDA) no Sunrise, hahú deskuti kona-ba preparasaun ba loron istóriku ida ne'e.
Komisáriu JPDA no Sunrise Timor-Leste, Rui Maria Alves Soares hatete, reuniaun entre komisariu sira hosi nasaun rua ne’e, hahú kedas iha 2013. To’o agora, reuniaun hamutuk ba dala 51 ona.
“Reuniaun ne'ebé hala'o iha Hotel Novu Turizmo, Kinta (15/08/19) ami deskuti kona-ba asuntu hirak ne'ebé relevante ho seremonia troka nota diplomasia entre nasaun rua ne'ebé sei akontese iha loron 30 Agusto 2019,” Rui informa ba jornalista iha Hotel Novu Turizmo, Kinta (15/08/19).
Nia dehan, reuniaun ba dala 51 ne'e hanesan reuniaun ikus ona atu haree ba asuntu preparasaun JPDA iha ambitu aranju tranzitoria tratadu foun tama iha vigor. “Komisáriu sira husi nasaun rua nia funsaun, atu haree kona-ba JPDA (area konjuntu),” Rui esplika.
Entretantu, komisáriu JPDA ida husi Austrália nian promete katak sira sei halo konferensia imprensa iha semana oin kona-ba rezultadu husi reuniaun ne’e rasik.
