Print this page

PNTL Kaptura Sidadaun Na'in-50, Prezidente PN 'Livre' ba Áustria

By September 03, 2021 3671
PNTL Munisípiu Dili halo identifikasaun ba sidadaun hamutuk na'in-50 ne'ebé kaptura iha área Manleuana. PNTL Munisípiu Dili halo identifikasaun ba sidadaun hamutuk na'in-50 ne'ebé kaptura iha área Manleuana. Foto Suplay

Tempotimor (Dili)-Prezidente Parlamentu Nasionál (PN), Aniceto Longuinhos Guterres Lopes, ho Deputadu Luís Roberto da Silva no Deputadu António da Conceição "Kalohan" livre halo viajen ba nasaun Áustria, loron sesta (03/09) iha tempu aplikasaun Konfinamentu Domisiliáriu Jerál (KDJ).

Maibé Polísia Nasionál Timor-Leste (PNTL) liuhusi Komandu Munisípiu Dili, iha loron kinta (02/09), kaptura sidadaun hamutuk na'in-50 iha área Manleuana, tanba halo atividade prodúz batako iha tempu Konfinamentu Domisiliáriu Jerál hodi kontra rezoluasaun Governu nian.

Vise Prezidente PN, Luís Roberto da Silva deklara, ajenda PN hodi viajen ba nasaun Áustria, atubele partisipa Konferénsia Mundiál kona-ba parlamentar nian ne'ebé sei realiza ba dala-lima iha sidade vienna, Áustria.

"Lista ne'ebé atu ba partisipa iha ne'ebá, Deputadu na'in-3. Prezidente Parlamentu Nasionál, Vise ha'u rasik, ho deputadu Antonio da Conceição. E Aban dia 3 setembru ne'e atu sai husi Timor ba Malázia e depois kontinua filafali ba ne'ebá (Áustria)", dehan Luís Roberto da Silva iha PN, kinta (02/09).

Kritériu ba ekipa Parlamentu Nasionál hodi desloka ba Áustria, tanba molok ne'e sira tuir ona teste swab dala-tolu no vasina dala-rua, husi rezultadu ikus sufisiente ona atu prienxe kritériu husi Organizasaun Mundiál Saúde.

Purtantu kestaun konfinamentu obrigatóriu, atu limita sirkulasaun husi populasaun ne'e, bazeia ba regra saúde ninian, tanba ne'e hotuhotu tenke asumi responsabilidade ida ne'e.

"Ita kestiona filafali ba orgaun, ita nasaun Timor-Leste ukun ne'e ita labele izola-an mesak. Iha situasaun ne'ebé de'it ita sempre halo bilaterál ho nasaun sira seluk. Karik ida ne'e importante teb-tebes atu konvida tantu orgaun Ggovernu tantu orgaun Parlamentu, konvida kuandu importante teb-tebes atu partisipa ita sei partisipa, importante prienxe be kritériu saúde", dehan nia.

Komandante PNTL Munisípiu Dili, Superintendente Henrique da Costa deklara, husi sira-nia parte kaptura Sidadaun na'in-50, kompostu husi timoroan na'in-46, no estranjeiru na'in-4, tanba komete krime dezobediénsia ba regra ne'ebé Governu impoin iha konfinamentu, ho rezolusaun Governu númeru 115/2021, iha loron 26 fulan-Agostu ne'e

"Horisehik (02/09), ekipa patrulla konjunta, halo operasaun ba loja sira ne'ebé mak loke nomós kompaña hirak ne'ebé mak halo hela atividade. Ita ba área parte Dom Aleixo nian, iha fatin rua, e ita-nia patrulla konjunta kaptura no bolu ema hirak ne'ebé halo hela servisu iha ne'ebá ne'e, lori mai edifísiu hodi halo identifikasaun. Ema hamutuk na'in-50, ne'ebé mak na'in-4 ne'e, sidadaun estranjeiru. Sira halo hela batako, sira halo hela servisu konstrusaun ninian, iha área Manleuana nian", hatete Superintendente Henrique da Costa, sesta (03/09).

Maske sidadaun sira ne'e, PNTL bolu ba halo identifikasan, hafoin haruka fila ba ida-idak nia hela fatin, tanba kondisaun sela detensaun munisípiu Dili nian kloot, nune'e labele detein.

Enkuantu, prosesu operasaun konjunta ne'e, hala'o husi Eskuadra Dom Aleixo, Komandu Munisípiu Dili, Forsa Rezerva, Servisu Investigasaun ho Tránzitu sira. (*)

Rate this item
(1 Vote)
Last modified on Friday, 03 September 2021 18:15
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items