"Osan ne'ebé mak Parlamentu aprova, Prezidente Repúblika promulga tiha ona, tenke fó ba sira jornalista, nomós polísia sira ne'ebé mak iha front line, ema ne'ebé mak besik ba ema moras sira ne'e. Se ita hakarak Parlamentu halo fali lei ida, Governu ba fali falun ema mate sira ne'e bele ka la'e", dehan nia.
Tanba, foin lalais bankada KHUNTO halo observasaun iha Sala Izolamentu Vera Cruz, sente kuitadu tanba maske ema hotu tauk ba situasaun Covid-19, maibè pesoal saúde sira deside tama ba izolamentu laran hodi fó haris no fó hatais ema sira ne'ebé mate ho situasaun Covid-19.
"Se hakarak foti fali desizaun ruma iha ne'e, se la tau matan ba sira ne'ebé mak iha risku, entaun Governu mak ba falun. Governu mak prepara kaixaun, Governu mak ba kous no fó haris ema nia isin mate ne'e hodi hatama kaixaun", deklara nia.
Ho ida ne'e Governu presiza haree, ba erru boot ida ne'e, husu atu osan ne'ebé mak Parlamentu Nasionál aprova ne'e tenke implementa duni.
Husu Governu atu nafatin kontinua hahán sesta bázika ba povu sira ne'ebé mak kbi'it la'ek, liliu fahe osan ba sira ne'ebé mak la hetan osan. (*)