"Suspensaun ne'e fó ba ha'u atubele kandidata-an ba Prezidente Repúblika, avontade", dehan nia iha rejidensia Metiaut, kuarta (01/09).
Maibé, karta suspensaun ne'ebé bispu fó ne'e, tenke ba hasoru filafali bispu na'in-rua seluk, atu aprezenta-an. Tanba prosesu kandidata-an ba PR, presiza iha obrigasaun husi Bispu na'in-tolu iha atu fó hanoin ruma kona-ba, (igreja nia doutrina bainhira atu tama ba vida polítika.
Ho ida ne'e, eleisaun prezidensia ne'ebé sei akontese iha tinan 2022, maske partidu ida-rua ho kandidatura, maibé naran padre Martinho tama nafatin iha partidu hothotu tanba ne'e nu'udar alternativu ida.
Oras ne'e, Amu Martinho mós hakerek ona dokumentu kompletu hodi haruka ba partidu CNRT, maibé sira responde de'it katak kongressu mak foin bele haree.
Nune'e mós ba Partidu Demokratiku (PD) ko'alia ona, maibé iha nivel estrutura nasionál inklui parte PUDD nian hetan apoiu pursentu atus-ida (100%).
"Nomós eis PLP, eis KHUNTO, no eis Fretilin, barak mak hanesan tau laran ba ha'u. Ne'ebé di'ak hela, ha'u mantein pozisaun nu'udar kandidatu independente, porque kandidatura independente mak bele jamin, primeiru unidade, segundu Liberdade, terseiru karidade. Ha'u sempre repete liafuan ida ne'e, amu lulik ida ne'ebé hili dalan atu tama polítika, igreja tau iha ninia kabas leten liafuan tolu", hatete nia.
Bainhira kandidata-an mak hakarak iha primeira dama, ida ne'e tuir amu papa nia karta mai prontu bele, maibé amu papa nia karta mai mak tau sarani babain, siknifika katak tenke hala'o kna'ar politika babain.
"Atu konkorda ha'u ba prezidente repúblika ka la'e, Bispu hotu, amu papa hotu, lian ida de'it ona. Ho karta amu bispu nian ne'e, igreja fó nia ema, sakrifika nia ema ida ba atu serví ba nasaun, povu, no ba sarani sira, maibè liliu ba povu tomak porque povu Timor-Leste ne'e la'ós hothotu sarani katólika", dehan nia. (*)