"Ha'u atu hatete katak, horisehik (30/08), atan ha'u partisipa direta hamutuk ho Vise Primeira Ministra (PM), Armanda Berta dos Santos hodi ba tama iha sala izolamentu ka sala ne'ebé saudoza Iria Berta dos Santos ne'ebé hakotu nia peregrinasaun iha lahane. Hanesan deputadu wainhira haree Governu sira foti mate isin hodi mai hatama iha kaixaun laran ne'e, ha'u-nia laran ne'e sente susar teb-tebes, tanba Ministériu Saúde la trata asuntu sira ne'e hodi dignifika ema matebian", dehan nia iha Plenária PN, tersa (31/8).

Tanba, Vise Primeira Ministra no Ministra Solidaridade Sosiál no Inkluzaun (MSSI) hamutuk ho deputadu sira hakat ba vizita bainhira matebian Iria Berta dos Santos hakotu nia peregrinasaun iha Izolamentu Lahane. Enkuantu saudoza nia isin mate ne'e sira hatama ba sakola laran depois hatama ba kaixaun laran, purtantu kaixaun ne'e tau de'it rai leten de'it.

Ho ida ne'e husu ba deputadu sira liliu komisaun F, tenke halo intervensaun diretamente ba fatin izolamentu sira hodi haree no obsrrva situasaun real ne'ebé mak akontese terenu.

"Horibainhira kuandu ita-nia sua exelensia Primeiru Ministru mai iha ne'e, ha'u ko'alia lia badak de'it. Ha'u dehan saida husu ba Primeiru Ministru, orienta ba ita-nia Ministériu Saúde atu trata asuntu saúde ne'e trata ho umanidade", dehan nia.

Nu'udar deputadu, lakohi esplika klean liután, tanba kuandu esplika ne'e, failansu sira ne'ebé iha sei fakar sai hotu.

Deputadu KHUNTO, Luis Roberto konsidera Governu desvaloriza no haluha lisan husi Timor nian tanba de'it tauk Covid-19.

Tanba ne'e, halo tratamentu ba ema sira ne'ebé mate iha ospitál ho situasaun Covid-19, dezenkuandu ladun dignifika sira-nia mate isin ne'e.

"Ita-nia kultura hakerek buat seluk ida, haree filafali ba ita-nia lei kustumeru mos hatete momos, tan de'it Covid, ita viola tiha regra lei kustimeru ninian", hatete nia. (*)