Tempotimor (Díli) – Ministru Reforma Lejislativa Asuntu Parlamentár (MRLAP), Fidelis Leite Magalhães konsidera lori ‘lia bosok’ ba públiku relasiona ho auzénsia Ministru Negósiu Estranjeiru no Kooperasaun (MNEK), iha seremonia tomada pose embaixadór Timor-Leste na’in tolu, Tersa (13/08/19) iha Palásiu Prezidensiál, Bairru-Pite.
Deputadu husi Bankada Demokrátiku Adriano do Nascimento, levanta kestaun ne'e iha plenaria ba dala ikus iha fulan Agusto, Tersa (13/08/19) iha Parlamentu Nasionál. Adriano preokupa loos tanba Timor-Leste haruka nia ema ba estranjeiru, maibé ministru ne'ebé tutela la marka prezensa iha tomada pose.
"Ohin Prezidente Repúblika fó pose ba embaixadór na'in tolu. Ha'u rona katak Ministru Negósiu Estranjeiru no Kooperasaun la marka prezensa iha tomada pose ne'e," Adriano kestiona iha plenaria.
Hatán ba preokupasaun deputadu ne'e, MRLAP hatete, MNEK la tuir seremonia tomada pose tan razaun la hetan konvite no kondisaun saúde ladún di'ak.
“Señor ministru MNEK la ba, tanba nia la hetan konvite ba pose. Ministru (MNEK) konfirma katak nia la hetan konvite no nia kondisaun saúde ladún di'ak. Maibé, razaun prinsipál mak la hetan konvite,” MRLAP Fidelis hatán ba perguntas husi deputadu Adriano.
Entretantu, komunikadu imprensa ne'ebé Palásiu Prezidensiál hasai, Kuarta (14/08/19) hatete, iha loron 9 Agostu 2019, Prezidénsia Repúblika haruka ofísiu ida ba Xefe Gabinete Ministro-nian, Dr. Agustinho Caet, atu informa kona-ba data serimónia ba tomada pose. Prosesu ne’e hotu hala’o ho dalan koordenada entre MNEC ho Prezidénsia Repúblika.
“Nune’e, prezensa Ministru Negósius Estranjeirus no Kooperasaun sai indispensável no tuir prátika bainbain. Laiha nesesidade atu haruka konvite hodi husu prezensa Ministru Negósius Estranjeirus no Kooperasaun, iha tipu serimónia ida ne’e, ne’ebé prezide husi Xefe Estadu,” hakerek komunikadu ne'e.
Iha parte seluk tempotimor.com koko liga ona ba Ministru Negosiu Estranjeiru no Xefe Gabinete Ministru ninian maibe infelizmente sorte la'ek tan ba telefone lian hela mas la iha ema ruma maka atende.