"Maske iha parte seluk enfrenta problema kona-ba komunidade sira-nia moris, tanba labele halo movimentu atu buka moris, bainhira rona Governu bandu labele halo viajen hodi sosa hahán no nesesidade sira seluk", dehan Xefe Suku Batara Tomas Pinto, hafoin partisipa serimónia lansamentu ba atribuisaun kartaun vasinasun ne'ebé hala'o husi Ministériu Asuntu Parlamentár no Komunikasaun Sosiál (MAPKomS), iha suku Batara, Laklubar, Manatuto, sesta (27/08).

Dadauk Suku Barata, iha populasaun hamutuk rihun-rua-atushitu-haatnolu-resin-haat (2.747) durante ne’e partisipa ativu iha programa vasina.

Maibé durante ne'e komunidade preukupa no ta’uk lakohi mate hamlaha, la’ós tanba Covid de’it mak halo sira tauk.

Maske nune'e, autoridade suku apresia tebes tanba rona informasaun husi parte saúde no líder suku sira, liliu estudante Laklubar oan ne’ebé hala’o sira-nia estudu iha universidade, fila ba postu hatudu ezemplu di’ak hodi simu vasina uluk hodi enkoraza mós inan-aman sira.

Ministru Asuntu Parlamentár no Komunikasaun Sosiál (MAPKomS), Francisco Martins Jerónimo hatete, kestaun ne'e dala-barak komunidade sira interpreta sala kona-ba regra estadu emerjénsia, serka sanitária inklui konfinamentu obrigatóriu,

Tanba regra sira ne'ebé Governu aplika ne'e la’ós atu bandu ema labele halo buat hotu, maibé só iha limitasaun ba direitu balu ne’ebé la’ós importante atu halo.

Ho ida ne'e, nesesidade bázika ne'ebé importante hanesan ba sosa ai-hán, sosa ai-moruk, ba ospitál, asuntu judisiál, ne'e bele, maibé importante mak tenke vasina hodi lori kartaun kinur atu justifika katak sira iha ona imunidade komunitária atu asegura viajen hodi bele prevene moras ne’e da’et tutan ba ema seluk, tanba ne’e presiza vasina. (*)