Alkatiri hatutan, dalaruma Xanana sei halo konfrontasaun ho nia, tanba lakohi atu entrega relatóriu kona – bá negosiasaun fronteira maritima entre Timor – Leste ho Austrália ne’ebé asina ona iha kuartel jeral Organizasaun Nasões Unidas (ONU) iha loron 6 Marsu liubá, maibé Alkatiri mós rekoñese katak, ministru Agio Pereira aprezenta ona relatóriu ba governu. 

“Ha’u hatene sasan balun no iha informasaun, balun tenta atu loke konfrontasaun entre Xanana mai ha’u. Sira nia objetivu nune’e, ami nain rua atu konfrontasi,” hatete Alkatiri iha Ai – Mutin, Dili foin lalais. 

Liga ba kestaun ne’e, antes ne’e lideransa Forsa Armada Timor – Leste nian inklui lider partidu balun dun katak, jerasaun foun sira mak koko atu hafahe lider historiku sira iha situasa un politika atual. 

“Ha’u hanoin deklarasaun ne’ebé dehan jerasaun foun mak atu fahe lideransa tuan sira ne’e erradu (sala boot) no mehi sala. Se hanesan ne’e entaun jerasaun tuan sira dependênsia ba jerasaun foun,” hatete estudante universitariu, Agusto M.D.C Freitas. 

Estudante iha fakuldade ekonómia ne’e mós lamenta ho hahalok lider balun ne’ebé sempre update status provokativu iha media sosial (Facebook) hodi so’e lia (piadas) no insulta lider historiku seluk. 

“Ha’u akompaña iha Facebook katak boot partidu ida mak durante ne’e badinas loos halo piadas ka insulta lider seluk,” hatutan Agusto.

Iha loron 17 Marsu liubá iha Vila Verde, Alkatiri mós lamenta tebes ba prezensa Kay Xanana Gusmão nian ne’ebé momentu fila hosi rai liur, tuir loloos labele ba direitamente sede konjuntu Aliansa Mudansa ba Progresu (AMP), maibé tenke ba iha palásiu governu hodi relata relatóriu kona – bá prosesu negósiasaun no asinatura ba fronteira maritima entre Timor – Leste ho Austrália. 

Maibé antes ne’e, Xefe Negosiador prinsipal ba negosiasaun fronteira maritima, Kay Rala Xanana Gusmão hatete, sei la aprezenta relatóriu ba governu, tanba nia la’ós ba reprezenta governu, no mós la’ós nu’udar membru governu. 

Xanana hatutan, rajaun sei la aprezenta relatóriu ba governu kona – ba prosesu negósiasaun fronteira tasi nian entre Timor – Leste ho Austrália, tanba nia ba la’ós reprezenta governu. 

“Ha’u la’ós membru governu. Iha ajente governu nian mak reprezenta governu iha ne’eba mak adjuntu primeiru – ministru ba delimitasaun fronteira maritima Agio Pereira,” hatete Xanana iha sede Aliansa Mudansa ba Progresu (AMP), Bairo Grilo – Dili, Sesta (16/03).

Nia hatutan, sei laiha ema ida inklui primeiru – ministru atu husu nia kona – bá relatóriu ne’e. Tenke husu ba reprezentante governu,” esplika Xanana.

“Ha’u ba halo serbisu la’ós buka asinatura, maibé ba atu manan,” deklara Xanana ho lian nakdedar.

Xanana mós so’e lia katak nia lahatene saida mak governu sestasaun (jestaun) ne’ebé lidera hosi primeiru – ministru Mari Alkatiri.

“Ha’u mai to’o Dili labarik sira husu ha’u atu esplika governu jestasaun (jestaun), ha’u mós lahatene ida. Sira dehan avo Nana ami lahatene saida mak governu jestasaun,” hatete Xanana.

Xanana hatutan, to’o oras ne’e mós nia lahatene governu ne’e iha ne’ebé.

“Lahatene governu iha ne’ebé mak ne’e, ha’u mós lahatene ida,” hatutan Xanana. (Oki)