"Ha'u deklara tiha ona iha plenária, katak ne'e lapsu ida, redasaun lejistika ninian, ita-nia observasaun antes ne'e mós observa tiha ona katak artigu ne'e atu halo nova redasaun mais la konsege halo", dehan Prezidente Komisaun A, Joaquim dos Santos, iha PN, segunda (23/08).
Ho lapsu ne'ebé mosu, Komisaun A tenta atu hadi'a ninia redasaun ne'e maibé la konsege. Tanba ne'e, pozisaun Prezidente Repúblika hodi haruka filafali ba PN, prefere ba deputadu sira se bele halo tuir de'it pedidu Prezidente Repúblika nomós Tribunál.
"Ita labele prodz lei kontra konstituisaun. Di'ak liu hasai, ne'e depende deputadu sira, mais ha'u hanoin bele, ne'e la'ós problema boot, ne'e problema redasaun lejístika", hatete nia.
Iha loron 06 Agostu 2021 Tribunál Rekursu deklara katak artigu 17 númeru 2 hosi Dekretu Parlamentu Nasionál ne'e Inkonstitusionál, tanba konfronta ho artigu 38 husi Konstituisaun.
Ho ida ne'e, viola prinsípiu ba espesifikasaun ba finalidade no limitasaun ba uzu, ne’ebé hateten iha artigu 38 husi Konstituisaun, introdúz restrisaun ne’ebé bele vulnera, ho dalan injustifikadu no forma la proporsionál, tuir direitu ne’ebé previstu iha artigu 38 Konstituisaun.
Enkuantu Dekretu Parlamentu Nasionál (PN) númeru 43/V alterasaun dahuluk Lei Resenseamentu Eleitorál aprova ona ho unanimidade ho votu 62 iha Sesaun Plenária Parlamentu Nasionál ne’ebé hala’o iha loron 28 fulan-Juñu tinan 2021. (*)
