SEKomS, Mericio Juvinal dos Reis 'Akara', husu ba Rádiu Komunidade sira atu kontinua haraik-an hodi aprende nafatin ho vontade hodi aumenta kapasidade hodi eleva Rádiu Komúnidade ne'e ho di'ak no ba oin.
"Ita tenke avontade no kontinua aprende, liliu tuir Workshop sira ne'e nafatin atu ita hasae tan ita-nia koñesimentu, hasae tan ita-nia esperiénsia reforsa tan ita-nia matenek sira ne'ebé mak durante ne'e ita iha, hodi lori rádiu Komúnidade ne'e ba oin", dehan Mericio Akara, bainhira asina akordu ho rádiu 16 iha Ótel JL Villa, Fatuhada, segunda (23/08).
Rádiu Komúnidade sira tenke atuliza-an no adapta iha era dijitál tanba plataforma analog ba dijitál ne'e hanesan oportunidade ida mós ba Rádiu Komunidade sira atu aprende.
"Durante ne'e ita-boot sira komesa aplika ona prátika balu hahú la'o ona liu rádiu streaming maibé koñesimentu plataforma dijitál ne'e bele aumenta tan ita-boot sira-nia kapasidade ho di'ak", dehan lnia.
Maske rádiu Komúnidade ne'e tuir loloos ne'e sustenta husi komunidade rasik maibé tanba Governu haree kondisaun ekonomia ladun di'ak mak Governu kontinua fó subsídiu atu ezistensia ne'e bele kontinua.
Diretór Diresaun Nasionál Promosaun no Dezenvolvimentu Mídia Lokál SEKomS (DNPDML-S), José da Costa hatete, akordu ne'e la'ós foin primeira vez, maibé hahü kedan husi tinan 2015, Governu atraves de SEKOMS kontinua apoiu Rádiu Komunidade estasaun 16 liuhusi fundu transferénsia públika ne'e iha tinan ida halo transferénsia dala rua.
"Apoiu segundu faze ne'e kuaze 75 mill ba estasaun 16 inklui defiesiente mais ita-nia alokasaun orsamentu la'ós barak maibé oituan-oituan kada rádiu bele hetan 4,5 ou 6 mill depende ba sira-nia ezekusaun", dehan nia.
Tanba Governu mós iha progama 5 ne'ebé fó ba rádiu komunidade sira, bainhira sira la ezekuta programa ne'e mak osan halo redusaun no fó fali ba rádiu sira ne'ebé iha nia kreatividade di'ak.
Eduardo Exporto, Jestor Rádiu Tokodede Rekomenda ba SEKomS atu fó nafatin formasaun ba sira oinsá teknikamente públika notísia online ne'e tanba durante ne'e sira-nia jornalista públika notísia analog de'it.
"Husu ba SEKomS atu fasilita ami mak loke formasaun mai ami hodi utiliza sistema dijital ne'e tanba hakerek notísia online ho analog ne'e nia konteudu hakerek ne'e la hanesan", hatete nia. (*)
