Governu-RAEOA-ZEESM Tenke Solusiona Ró Haksolok Featured

Ro Haksolok iha momentu inaugura iha Portugal Ro Haksolok iha momentu inaugura iha Portugal Foto Midia ZEESM
Tempotimor (Dili) – Prezidente Parlamentu Nasionál (PPN) husu ba Governu sentrál no autoridade RAEOA-ZEESM, tenki solusiona lalais problema ró Haksolok, ne'ebé to'o agora seidauk mai Timor-Leste.
 
“Kazu ró ne'e seriu. Ne'ebé, tenke iha klareza kona-ba asuntu ida ne’e. Tanba, ró ne'e ita selu hotu tiha ona. Depois, ró ne’e rasik agora ita lahatene ninia kondisaun no nia paradeiru, husi inísiu to’o bainhira mak lori mai,” afirma PPN, Arão Noé de Jesus Amaral ba jornalista iha PN, Sesta (09/08/19).
 
Tuir informasaun ne’ebé PPN rona katak, Governu foti ona inisiativa atu halo levantamentu dadus ba asuntu ró-Haksolok. “Ita hein, opsaun saida mak Governu atu foti. Maibé, sei laiha duni Parlamentu Nasionál bele kria komisaun inkéritu para halo verifikasaun ba asuntu ró ne'e,” Arão hatete. 
 
Nia espera, orgaun ida-idak hala’o ninia knaar. Tanba, Governu hanesan orgaun ne’ebé mak másimu ba ezekusaun OJE. “Governu iha dever morál atu buka tuir prosesu ne’e. Nune’e hein bainhira Governu la konsege, PN bele foti asaun bazeia ba lei ne’ebé fó dalan,” nia afirma.
 
Presiza Tan Millaun $14
 
Maske prosesu konstrusaun ró Haksolok atinze ona porsentu 70, maibé atu finaliza Governu Timor-Leste presiza hasai tan osan adisionál hamutuk millaun $14 resin.
 
Ministru Transporte no Komunikasaun (MTK), José Agustinho ne'ebé fulan hirak liubá ba haree rasik prosesu konstrusaun ró Haksolok iha Portugal informa, progresu ba ró-ahi ne'e la'o nafatin.
 
“Ha'u la'ós haree husi oklu tekniku ninian. Maibé, progresu ró-ahi nian la'o nafatin. Karik bele tau ba iha porsentajen 65-70%,” hatete MTK, José Agustinho ba jornalista, Segunda (27/05/2019) iha Palásiu Governu.
 
Kona-ba orsamentu, Ministru José hatete, Governu aloka ona orsamentu millaun  $13 ba prosesu konstrusaun nian. “Prontu, orsamentu adisionál ne'ebé konforme sira informa mai delegasaun pur volta de $14 milioens-itál, ne'ebé sei tau iha tinan ida ne'e,” ministru ne'e afirma.
 
Tuir kontratu, ró-ahi Haksolok konstrui husi kompañia ho naran Eagel Ship Building husi Portugal.
Rate this item
(0 votes)
Last modified on Friday, 09 August 2019 19:08
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com