Deputada bankada FRETILIN, Maria Angelica Rangel hatete, presiza muda dekretu lei ne'e tanba kondisaun agora povu maioria sei utiliza motorizada mak tula oan ba eskola.

“Tanba ida ne'e mak ha’u hanoin katak Governu tenke haree detallu liu iha polísia sira atu haree dekretu lei ida ne'e, atubele halo alterasaun”, dehan nia iha plenária PN, tersa (17/08).

Maskez dekretu lei númeru 6/2003, de 13 de abril, kódiku estrada nian, iha artigu 85 ne'e regula duni labele transporta labarik sira ne'ebe nia idade 6 mai kraik ho motorizada, maibé naturalmente populasaun Timor-Leste mínimu ne'e ema iha motorizada de'it.

Tanba ne'e, Governu nafatin utiliza dekretu lei ida ne'e, sei fó impaktu maka’as ba inan-aman sira atu transporte sira-nia oan ho idade ki'ik ba eskola.

Deputadu bankada PLP, Abel Pires hatete, nia parte preokupa kona-bá esforsu atu implementa lei ne'ebé tuir planu atu bandu inan aman sira labele tula oan ho motorizada.

“Ha’u hanoin parese ke di’ak ita halo impelemntasaun ne'ebé seletivu, tanba realidade maioria povu Timor ne'e só bele iha forsa ekonomia sosa motorizada, se ita bandu sira ne'e sei kria problema barak liután”, esplika nia.

Ba implementasaun ne'e rasik sei hamosu problema barak, tanba estadu rasik seidauk iha kondisaun atu fó garantia ka sai alternariva ba implementasaun lei ida ne'e.

“Ha’u hanoin di’ak liu ita foka liuba seguransa, bele tula oan sira maibé tenke uza kapasete”, hatete nia. (*)