Tempotimor (Dili) – Ministru Negósiu Estranjeiru no Kooperasaun (MNEK), Deonisio Babo husu ba povu Timor-Leste tomak atu iha tinan 2019 ne'e, reza maka'as para Timor-Leste bele adezaun ba ASEAN.
Babo informa, iha loron 4 to'o 6 Setembru 2019, ekipa hosi ASEAN sei mai iha Timor-Leste hodi haree nasaun ne'e nia rekursu para bele adezaun hamutuk ho nasaun ASEAN na'in 10 sira seluk.
"Ekipa ida husi ASEAN, kuaze ema na'in 50 hanesan ne'e sei mai halo avaliasaun ba ita nia prosedimentu sira, tanba iha ‘surat tahan’ leten, ita membru ASEAN ona. Maibé, ita prienxe ona rekejitus ka lae? Se balun seidauk, ita tenke hadi'a-tan. Entaun depois loron rua ne'e mak ekipa ne'e hamutuk ho ministru balun ba halo vizita kortezia ho ita nia Primeiru Ministru," dehan MNEK Babo iha Palásiu Governu, Kuarta (07/08/2019).
Tuir Babo, TL hein tinan ualu ona atu tama ba Asosiasaun Nasaun iha Rejiaun Sudeste Ásia ne'e. Maibé, sira (ASEAN) dada nafatin. Tan ne'e, iha 2019 povu Timor-Leste tenke reza maka'as.
"Dezde 2011 ita atu tama ba ASEAN. Maibé, sira dada bebeik. Ne'ebé, 2019 ne'e ita reza para sira formula ona desizaun TL nia pozisaun. Ha'u dehan tiha ona ba sira, ami hakarak tama ASEAN. Ami hein tinan ualu tiha ona. Ha'u dehan, ami TL preparadu tama ASEAN," Babo dehan.
Nasaun 10 mak to'o agora sai ona membru ASEAN. Hanesan; Brunei Darrusalam, Kamboja, Indonézia, Laus, Malázia, Birmánia, Filipinas, Singapura, Tailándia no Vietname.
Asosiasaun Nasaun iha Rejiaun Sudeste Ásia ne'e, harii iha loron 08 Agusto 1967 liuhosi Deklarasaun Bangkok, ne'ebé deklara husi nasaun; Indonézia, Malázia, Filipinas, Singapura no Tailándia.