Tempotimor (Dili) – Jenerál Lere Anan Timur, husu ba ema hotu atu lalika preokupa ho lideransa na'in lima (5) hanesan: Xanana, Mari Alkatiri, Lú Olo, Ramos Horta no Taur Matan Ruak.
“Agora, lider sira hanesan maun Xanana, maun Mari, Lú Olo, Ramos Horta, Tau Matan Ruak, imi tuur hamutuk ka la tuur hamutuk ne'e, problema imi nian. Ita lalika preokupa sira na'in lima ne'e," tenik Jenerál fitun rua ne'e, bainhira remata enkontru ho Prezidente Repúblika iha Palásiu Prezidensiál, Bairru-pite, Kuarta (07/08/19).
Lere katak, iha nasaun demokrasia diálogu entre lideransa ne'e normál. Tanba, bainhira laiha diálogu mak sei sees husi dalan demokrasia. Tan ne'e, tuir Lere, lider sira atu tuur hamutuk ka lakohi, ida ne'e la'ós kestaun. Kestaun mak serbisu tenke la'o. Nia dehan, polísia tenke iha estrada nafatin, finansas kontinua la'o nafatin para selu funsionáriu sira.
“Ita lalika preokupa ho lider nasionál sira ne'e. Ita lalika hanorin sira. Ita kiik sira ne'e, iha servisu ona. Nusa la halo serbisu o mós toba, o mós hein de'it aproveita sai oportunista. Sira lakohi diálogu, be ha'u mós lakohi serbisu. Ne'ebé, ha'u hanoin ida ne'e mós sala boot ba ita ki'ik sira," Lere dehan.
