Tanba ne’e, Dekretu Parlamentu Nasionál númeru 43/V-Primeira alterasaun ba Lei númeru 6/2016, 25 maiu, lei Rresenseamentu eleitorál iha 6 agostu 2021, la konsege hetan promulga husi Prezidente Rublika.

“Liuhusi análiza ba Dekretu Parlamentu Nasionál ne’e, iha 23 jullu,  Prezidente Repúblika hato’o pedidu ba Tribunál Rekursu halo fiskalizasaun preventiva ba konstitusionalidade Dekretu Parlamentu Nasionál”, dehan PR iha komunikadu imprensa, kinta (12/08)

Tanba iha 6 agostu 2021, Tribunál Rekursu deklara artigu 17 númeru 2 husi Dekretu Parlamentu Nasionál mak Inkonstitusionál. Akordaun Tribunál Rekursu hatete, artigu 17 númeru 2 husi Dekretu Parlamentu Nasionál konfronta ho artigu 38 husi Konstituisaun, viola direitu ba klarifikasaun kona-ba finalidade ba dadus sira, enkuantu hakat liu direitu ba koñesimentu ba dadus pesoál, ne’e viola prinsípiu ba espesifikasaun ba finalidades no limitasaun ba uzu, ne’ebé hatete iha artigu 38 husi Konstituisaun, introdús restrisaun ne’ebé bele vulnera, ho dalan injustifikadu no ho forma la proporsionál, tuir direitu ne’ebé previstu iha artigu 38 Konstituisaun.

Nune'e akordaun Tribunál Rekursu nian deside katak, artigu 17 númeru 2  husi Dekretu Parlamentu ne’ebé hatete Diretór Jerál STAE autoriza komunikasaun dadus konstantes husi baze de dadus resenseamentu eletorál ho instituisoins bankária, finanseira no telekomunikasaun ne’ebé hetan lisensa iha territóriu nasionál, ba efeitu verifikasaun identidade, rezidénsia, inskrisaun iha baze de dadus resenseamentu eletorál.

Nune’e mós númeru kartaun eleitór husi kliente sira iha ámbitu operasaun no prosedimentu kontrolu internu ba indentifikasaun kliente sira, no ba prevensaun brankamentu kapitál no husi finansiamentu terrorizmu. 

“Artigu ida ne’e la tuir Konstituisaun artigu númeru 38 ne’ebé garante direitu ba liberdade, seguransa no integridade ema ida-idak ninian”, hatete PR Lú Olo.

Dekretu Parlamentu Nasionál númeru 43/V- primeira alterasaun lei resenseamentu eleitorál, iha sesaun plenária Parlamentu Nasionál aprova ho unanimidade ho votus 62, iha loron 28 fulan-juñu tinan 2021. (*)