“SEKomS ho UNICEF ne'e koperasaun di'ak tebes iha tinan naruk ona, desde 2010, liliu sira apoia rádiu Komúnidade durante tinan naruk ne'e la'o di'ak tebes, tanba ne'e ohin ami asoru malu nune'e oinsá ba oin kooperasaun durante ne'e ita mantein hodi kontinua kolabora ho rádiu Komúnidade sira”, dehan Mericio Akara, bainhira sorumutu kortezia ho Reprezentante UNICEF iha salaun SEKomS, Palásiu Governu, kuarta (11/08).

Tanba iha ona ideia foun atu hahú halo kooperasaun liliu iha área literásia dijitál atu kontinua promove internet saúdavel no oinsá promove sentru informasaun iha suku sira atu joven no labarik sira bele asesu ba informasaun.

“Programa ne'ebé mak SEKomS halo mak programa naroman ba suku, nune'e iha atividade hirak ne'e UNICEF konsidera programa ne'e interesante tebes, tanba ne'e sira atu kolabora halo dialogu komunitáriu hodi apoiu telekonferens nomós promove sentru informasaun iha nível suku”, esplika nia.

Reprezentante UNICEF, Bilak Aurang Zeb Durrani, mós orgullu ho koperasaun refere tanba ne'e sira mós sei nafatin servisu hamutuk ho Governu ba área komunikasaun nia

“Agradese tebes tanba ita servisu hamutuk ho SEKomS ne'e lori tinan naruk ona desde 2011 ate agora, servisu ne'e la'o di'ak tebetebes, tanba ne'e ohin ami sorumutu kortezia hodi oinsá ba oin ne'e ita halo kooperasaun ne'e di'ak liután”, dehhan nia.

Ba futuru SEKomS ho UNICEF sei servisu hamutuk iha programa televizaun no rádiu nomós iha área sira seluk kona-ba prevensaun covid-19 no vasina Covid-19.

Nune'e mós kona-ba dijital literásia, xefe internet, nomós atu servisu hamutuk ba programa SEKomS nia iha Programa Naroman ba suku, oinsá envoleve foinsa’e sira no labarik sira iha suku. (*)