Tuir Vise Xefe Bankada FRETILÍN, Francisco Miranda Branco iha salaun Bankada Fretilin katak, ema balun hahú konta ona istória luta ba libertasaun nasional TL nian. Maibé, hahú haluhan mós fígura importante balun ne'ebé kontribui iha TL nia liberdade. 

"Tinan 43 ba kotuk, FRETILÍN deklara unilaterál independente RDTL lori povu nia naran. Liu tiha tinan 20 resin, povu rasik liuhosi konsulta populár, maiória afirma saida mak FRETILÍN proklama iha tinan naruk ba kotuk hakarak ukun aan,” dehan Francisco Miranda Branco iha salaun bankada FRETILÍN, Tersa (06/08/2019).

Ami sei koñese

Tuir Branco, ohin loron ema barak rona istória konta barbarak ba rai TL. Ne'ebé istória ne'e atu dezvia, destorse husi lia loos. Haluhan tiha balun no promove de'it figura balun. Tan ne'e, nia afirma, bainhira konta istória, konta istória ho loloos, maske fígura balun ema la gosta. 

"Istória ne'e tenke tau loloos nia dalan, no hotu-hotu ne'ebé ita la gosta mós iha laran hotu. Labele sai fali istória ne'ebé hatudu ba ita-nia aan de'it, ne'e laloos," dehan Branco 

Iha fatin seluk, deputadu Cornelio Gamma ‘L7’ husi Bankada PLP katak, sira ne'ebé sei moris hatene istória husi 75 to'o TL ukun aan. 

"Kona-ba istória husi 1974 to'o 1999, ami hatene tanba ami sei moris. Agora, husi rejiaun ida mak, Lere Anan Timur, Aluk, Rena no Maunana. Rejiaun rua mak, Sabika, Maubuti, Lú Olo, Biloumai no sira seluk. Rejiaun tolu mak L7, Saudozu Samba 9 no Riak Leman. Rejiaun haat mak Tata Mailau, ami ne'e sei moris hela. Ami ne'e mak konta istória," dehan L7. 

Tuir L7, lideransa sira ne'ebé hetan fiar ba frente diplomasia ne'e sira koñese. "Frente diplomasia sira ne'ebé ba liur ne'e ami koñese hela. Tanba ne'e, sira ne'ebé ba liur ne'e tenki iha relatóriu. Aban bainrua, oan no bei-oan sei dehan, uluk ha'u nia apa no avó mós partisipa iha funu. Maibé, tanba saida nia naran la tama iha istória laran," tenik deputadu L7