"Ha'u só bolu atensaun ba kuadrus dirijente sira, membru Comite Central sira, membru komisaun polítika, iha FRETILIN, bainhira Comite Central ka órgaun FRETILIN nian, foti desizaun dehan dalan mak ida ne'e, ita tenke tuir dalan ne'e. Sira be ha’u akompaña dadauk, ha’u Sekretariu Jeral akompaña dadauk be la tuir dalan ida ne’e, ha’u sei konvoka fali Komisaun Politika, ha’u sei konvida sira atu rezigna a’an. Ne’e ha’u hatete ona,” diskursu Alkatiri iha konvíviu popular iha CCF, Komoro – Dili, Sabado (03/08). 

Entretantu, iha loron Tersa 16 fulan Jullu liubá, molok Parlamentu Nasionál aprova pakote lejislasaun 4 no mós ratifika tratadu fronteira maritima, bankada FRETILIN liuhosi konferensia imprensa deklara uluk ona hodi vota kontra, no rezuladu ikus mai deputadu FRETILIN sira vota kontra total tantu hahu hosi votasaun jeneralidade, espesialidade to’o iha votasaun final global no liliu vota kontra tan ratifikasaun tratadu fronteira maritima.

Proposta Lei 4 no rezolusaun ida ne’ebé deputadu FRETILIN sira vota kontra total iha loron 23 fulan Jullu liubá mak hanesan; Proposta Resolusaun ho Número 2/V (1a) kona – bá ratifikasaun tratadu entre Timor – Leste ho Australia, ne’ebé estabelese respetivas Fronteira Maritima iha tasi Timor, Proposta Lei Número 4/V (1a) – alterasaun daruak ba Lei Número 13/2005, 2 Setembru kona – bá Lei Atividade Petrolifera (LAP) hetan votu afavor 41, kontra 23 abstensaun ida hosi deputadu PD, Adirano do Nascimento, proposta Lei Número 5/V (1a) – alterasaun daruak ba Lei Número 9/2005, 3 Agostu kona – bá Lei Fundo Petroliferu hetan votu afavor 41, kontra 23, no abstensaun ida hosi deputadu PD, Adriano do Nascimento.

Entretantu, proposta Lei Número 6/V (1a) – Alterasaun dahuluk ba Lei Número 8/2008, 30 Juñu kona – bá Lei Tributaria, no alterasaun dahuluk ba Lei Número 3/2003, 1 Jullu kona – bá Tributasaun Kontratantes de Bayu Undan, alterasaun dahuluk ba Lei Número 4/2003, 1 Jullu kona – bá Dezenvolvimentu Petróleu Tasi Timor (Estabilidade Tributária) hetan votu afavor 42, kontra 23 no abstensaun mamuk, no ikus liu mak poposta Lei Número 7/V (1a) kona – bá Rejime Laboral no Migratoriu Espesial Aplikavel ba Projetu Bayu Undan ho votu afavor 42, kontra 23 no abstensaun mamuk. 

Proposta Lei 4 ne’e aprovadu ona iha Parlamentu Nasionál, maibé seidauk hetan promulgasaun hosi Prezidente – Repúblika, Francisco Guterres Lu – Olo. 

Alkatiri rona katak nia deputadu sira hatudu ona korajen hodi vota kontra, maibé iha kotuk deklara apoiu fali maioria. Kestaun ida ne’e mak halo Alkatiri ran nakali no hirus tebes hodi husu ba sira ne’ebé deklara apoiu maioria ne’e tenke hatama ona surat rezignasaun, tanba konsidera deklarasaun deputadu FRETILIN balun ne’e la respeita desijaun politika CCF nian iha tempu ne’eba. 

“La'ós ita-nia bankada tomak ho korajen vota kontra tuir orientasaun Komisaun Polítika Nasionál nian, no balun halo fali deklarasaun apoia maioria. Ne’e laiha hanesan ne’e. Di’ak liu sira hakarak rona ha’u ko’alia agora prepara a’an para rezigna a’an ona,” Alkatiri lansa ameasa ne’e. 

Alkatiri afirma, laiha dalan halimar ho FRETILIN, tanba FRETILIN ne’e moris nafatin ho ruin ho raan.

"Hakarak ba, ba. Ne'e livre, demokrásia. Ha'u fiar sira rona hela, see rona, halo favór segunda-feira hatama karta (rejigna-aan) ona," Alkatiri aviza ba kuadru FRETILIN balun ne'ebé deskonfia apoia maioria.

Nia haktuir, uluk kuadru balun sai hosi FRETILIN forma partidu foun, agora maibé mate hotu. Ho situasaun ne’e Alkatiri promete katak sei hala'o konferénsia ida hafoin tuun ba munisípiu 12 iha fulan-setembru tinan ida ne'e hodi esplika prosesu tomak.

Deklarasaun ida ne’e mós, uluk Alkatiri promete ona hodi halo referendu daruak ba munisipiu tomak ba programa governu dahitu nian ne’ebé rejeitadu iha Parlamentu Nasionál, maibé ikus mai ba halo de’it iha Oe – Kusi Ambeno.