Sekretáriu Meza Komisaun Permanente (SMKP), deputada Domingas dos Santos hatete, kona-ba hari’i edifísiu ne'd reuniaun líder bankada sesta (06/08), tékniku sira halo ona aprezentasaun kona-ba fatin liliu oráriu.
“Aprezentasaun primeiru kona-bá, fatin, depois kona-bá oráriu ne'ebé mak atu halo konstrusaun Parlamentu nian ne'e komesa husi agostu ba to'o 2023, sei akontese ba konstrusaun edifísiu Parlamentu Nasionál nian”, dehan nia iha PN, sesta (06/08).
Maibé, rai ne'ebé hari’i edifísiu ne'e, provizoriamente sei iha prosesu diskusaun tanba Parlamentu Nasionál seidauk deside fatin.
Tanba, kestaun fatin ne'e foin lalais muda dala tolu, ida iha Tasitolu, Hudi-Laran, nomós Kaikoli.
“Maibé seidauk fiksu, sei iha estudu barak atu tau lokasi”, esplika nia.
Ho ida ne'e, Parlamentu Nasionál sei haree no halo estudu barak tanba iha reuniaun mós aprezenta de'it katak fatin kuaze 8 ektare iha Kaikoli maibé seidauk fiksu.
“Tanba sei haree ninia kondisaun rai, se iha estudu barak ne'ebe mak presiza haree”, dehan nia.
Tuir planu, iha loron Segunda semana oin, Parlamentu Nasionál sei iha aprezentasaun hamutuk Konselhu Administrasaun, atubele deside fatin atu halo konstrusaun edifísiu PN foun. (*)