“Ha’u mai to’o Dili labarik sira ha’u atu esplika governu jestasaun (jestaun), ha’u mós lahatene ida. Sira dehan avo Nana ami lahatene saida mak governu jestaun,” hatete Xanana iha sede AMP, Bari Grilos – Dili, Sesta, (16/03).
Xanana hatutan, to’o oras ne’e mós nia lahatene governu ne’e iha ne’ebé.
“Lahatene governu iha ne’ebé mak ne’e, ha’u mós lahatene ida,” hatutan Xanana.
Tribunál Rekursu legaliza rezultadu eleisaun parlamentar iha loron Tersa, 1 Agostu 2017 katak partidu:
- Bloku Unidade Popular (BUP) hetan votu 4.999 (0,9%)
- APMT hetan votu 5.461 (1,0%)
- KHUNTO 36.547 (6,4%)
- PEP 6,775 (1,19%)
- PST 4.891 (0,9%)
- PDP 2.079 (0,4%)
- CNRT 167.345 (29,5%)
- PR 3.951 (0,7%)
- UDT 11.255 (2,0%)
- PDC 1.764 (0,3%)
- MLPM 1.332 (0,2%)
- PLP 60.098 (10,6%)
- PD 55.608 (9,8%)
- UNDERTIM 1.216 (0,2%)
- PUDD 15.887 (2,8%)
- PTD 669 (0,1%)
- Frenti-Mudança 8.849 (1,6%)
- PSD 4.688 (0,8%)
- CASDT 2.330 (0,4%)
- PDN 3.846 (0,7%)
- FRETILIN 168.480 (29,7%)
Hosi rezultadu ne’e, partidu lima maka hakat liu barreira pursentu ha’at (4) mak hanesan FRETILIN hetan kadeira 23 iha Parlamentu Nasionál, CNRT kadeira 22, PLP kadeira ualu (8), Partidu Demokrátiku (PD) kadeira hitu (7) no KHUNTO kadeira lima (5).
Iha parte seluk, totál eleitór inskritu ba eleisaun parlamentár hamutuk 760.907, eleitór votante 583.956, votu válidu expressos 568.070 (97,28%), votu branku 4.097 (0,70%) no votu nulu 11.711 (2,01%).
Rezultadu ne’e hatudu katak, FRETILIN labele forma governu mesak, maibé tenke halo koaligasaun ho partidu sira seluk hodi bele forma governu. Nune’e, FRETILIN konvida partidu sira ne’ebé hetan asentu parlamentu iha tempu ne’eba, maibé ikus mai hetan de’it Partidu Demokrátiku hodi ikus mai froma de’it governu minoritá riu.
Hafoin governu minoritariu la’o, AMP rejeita tiha programa governu no la aprova orsamentu ratifikativu, rezultadu ikus mai prezidente Lu – Olo disolve Parlamentu Nasionál hodi desidi ba eleisaun antisipada.
Hosi akontesementu hirak ne’e, primeiru – ministru governu minoritariu Mari Alkatiri konsidera asaun AMP nian hanesan golpe ida ba nia governu. (Tempo Timor)
