Ministru Fidelis esplika ba emprezariu Timor oan sira sira katak fatin mamuk ba área turizmu, komersiu no industria ne’e sei nakukun hela, tanba to’o oras ne’e seidauk iha ministru definitivu ida mak assume kargu ne’e. Maske nune’e, alumni Universidade Harvard ne’e katak, ho konfiansa xefe governu nian ne’ebé depozita konfiansa ba nia iha área ne’e promete katak sei halo esforsu atu sunu netik lilin oan ida hodi fó netik naroman ba iha fatin nakukun ida ne’e.
Governante hosi munisipiu Bobonaro (Kuda Ulun) ne’e deklara katak, foin mak assume kna’ar ida ne’e iha loron 15 Juñu liubá.
Nia dehan, ida ne’ebé importante liu mak konfiansa hosi sidadaun sira no setor privadu sira ba iha governu ida ne’e.
“Ita boot sira presija konfiansa ba governu, no governu mós presija responde ba buat ne’ebé iha hodi bele fasilita setor privadu sira iha rai laran atu nune’e bele kontribui ba prosesu dezenvolvimentu setor ekonómia iha rai laran,” hatete Ministru Fidelis iha seremónia Kafé Dader ho estrutura Kamara Komersiu no Industria Timor – Leste (KKI – TL) iha Suai Room, Timor – Plaza, Comoro – Dili, Sesta (02/08).
Nia hatutan, investor sira iha mundu normalmente bainhira atu desidi hodi investe sira nia riku soin iha nasaun ida mós sira tenke konfia governu iha nasaun ne’ebé sira atu ba investe. Tanba ne’e nia husu ba emprezariu Timoroan sira ne’ebé hamahan a’an iha KKI – TL presija depozita sira nia konfiansa ba governu atual hodi bele atrai sira nia maluk invester sira hosi rai liur hodi bele brani no korajen mai investe iha rai laran.
“Investor sira atu investe iha nasaun ne’ebé sira tenke fiar governu ida ne’ebé kapaz, governu ida ne’ebé transparante no demokrátiku mak sira foin desidi atu investe,” nia esplika.
Governante hosi Partidu Libertasaun Popular (PLP) ne’e hatutan, kna’ar ne’ebé nia assume iha estrutura governu atual sei halo esforsu atu solusiona problema sira ne’ebé setor privadu sira hasoru hela iha rai laran.
Durante seremónia Kafé Dader ne’e, Prezidente KKI – TL, Oscar Lima ho nia maluk emprezariu sira seluk levanta assuntu oioin no difikuldade sira ne’ebé emprezariu Timor oan sira hasoru durante periodu impasse politika, maibé eis xefe kaza sivil ne’e promete ba empezariu sira katak sei halo esforu atu fasilita sira.