Prontu Serbisu, Formandu 222 Simu Sertifikadu Featured

Formandu sira foto hamutuk hafoin de simu sertifikadu iha ETDA, Fatuhada, Dili Formandu sira foto hamutuk hafoin de simu sertifikadu iha ETDA, Fatuhada, Dili Foto especial

By: Azia

Tempotimor (Dili) – Depois tuir formasaun lian Ingles durante fulan rua iha East Timor Development Agency (ETDA), Kuarta (31/07/19) formandu hamutuk 222 simu sertifikadu husi Seasonal Worker Program (SWP), Sekretária Estadu Formasaun Profisionál e Empregu (SEFOPE). 

Diretór Jerál da Politika de Formasaun Profisionál e Empregu, Paulo Alves ba jornalista hatete formandu na'in 222 ne'e simu kapasitasaun lian Ingles tanba hetan apoiu husi Department Foreign Affairs and Trade (DFAT), Embaixada Austrália iha Timor-Leste.  

“Programa kapasitasaun ba traballadór sira ne’e importante. Tanba, bainhira ba servisu iha rai liur sira presiza iha komunikasaun di’ak ho lian Ingles. Nune'e mós para dezenvolve sira nia an molok sira ba hala’o servisu iha Seasonal Worker Program (SWP) iha Austrália,” Paul Alves hatete. 

Diretór jerál ne'e garantia, Governu Timor-Leste liuhusi SEFOPE sei servisu hamutuk nafatin ho DFAT no Workforce Develepoment Program Timor-Leste (WDPTL). 

“Programa ne’e importante tebes ba kandidatu traballadór Timoroan sira. Ita-nia traballadór sira mós hetan prestasaun di'ak husi kompañia balun iha Austrália. Tanba, sira di’ak no badinas. Maibé, presiza hadi’a mak iha parte komunikasaun nian. Tanba komunikasaun ne’e importante tebes. 

Madalena Borges, formandu ida hato'o ninia apresiasaun ba formasaun ne’ebé mak fasilita husi SEFOPE no hetan apoiu husi Governu Austrália ne'e. 

“Pesoál ha’u sente orgullu tebes ho programa ne’ebé mak Governu TL liuhusi SEFOPE no Governu Austrália fasilita no prepara ami. Nune’e, ha’u hakarak rekomenda ba governu atu ba futuru halo di’ak liután programa ne’e ba kolega joven sira seluk ne’ebé mak sei tuir mai,” dehan Madalena. 

Iha fatin hanesan, formandu José M. de F. A. Moniz sente kontente tanba hetan apresisaun husi SEFOPE liuhusi sertifikadu ne’ebé formandu sira hetan.

“Ha’u agradese no apresia tebes bainhira simu ona sertifikadu. Ida ne’e, hanesan dalan ida ba ami hodi realiza ami nia mehi ne’ebé mak ami iha, liuliu oinsá atu ba servisu iha Austrália,” tenik José.

Tuir José, servisu ne’ebé nia sei halo mak nu'udar kondutor ka sofer. Maibé, José mós prontu bainhira governu liuhusi SEFOPE lori nia ba servisu iha área seluk. Tanba, nia dehan tan, parte ida atu aprende di’ak liután oinsá hala’o servisu iha Austrália.

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.