“Durante ne'e ita halo servisu di'ak, ita fó formasaun inklui relasaun públiku formasaun kona-ba protukolu, inklui multimedia ba ita-nia mídia oficcer governu nia nomós ita-nia jornalista balun mós tuir, entaun ita hanoin katak bele dezenvolve di'ak liután no bele hasa’e nia nível ba leten oituan, tanba ema ne'ebé partisipa ne'e antusiazmu los e ema hotu hakarak partisipa”, dehan Mericio iha Salaun Delta Nova bainhira halo abertura ba Foku grupu diskusaun Institutu profesionál komunikasaun no multimedia Timor-Leste (IPKoM-TL), tersa (27/07).

Tanba planu ba futuru insá halo korrikulun ne'ebé di'ak iha institu profesionál atubele aumenta matéria sira ne'ebé mak relevante no oinsá bele dezenvolve rekursu humanu timoroan,

“Hanesan temporariamente ita-nia formador bele husi rai li'ur maibé ba oin ne'e formadór sira tenke timoroan ona”, afirma nia.

Maske durante ne'e CEFTEC tau prioridade liuba mídia oficcer estadu, maibé haree entusiazmu husi mídia sira haruka ema mai partisipa iha diskusaun Foku grupu IPKoM-TL ho hanoin ida labele komité de'it ba mídia oficcer estadu nia maibé tenke loke tan formasaun ba públiku.

“Nune'e atu loke tan labele mantein de'it CEFTEC maibé hakarak hasa’e nia nível sai Institute profesionál ida para loke ba públiku liliu mídia sira, ne'ebé targetu ne'e ba oin kuandu instituisaun hamriik ne'e sei loke ba públiku liliu ba sira ne'ebé servisu iha área komunikasaun”, dehan nia

Maske Universidade Nasionál Timor Lorosa’e (UNTL) no Universidade Oriental Timor Lorosa’e (UNITAL) iha departamentu Komunikasaun Sosiál ne'ebé enjerál fó teoria oioin maibé formasaun ne'e mais espesifiku nune'e oinsá sai jornalista di'ak, hakerek di'ak, sai editór ne'ebé di'ak no domina multimedia atubele dezenvolve plataforma dijitál.

Iha fatin hanesan Koordenadór Interinu SEFTEC, Rafael da Silva Freitas hatete, diskusaun grupu ida ne'e atu koresponde ba ejizénsia kualidade kurrikulu, nesesidade rekurusu umanu, no fasilidade apoia formasaun ne'ebé sei implementa iha futuru Instituto Profesionál Komunikasaun Multimedia Timor-Leste (IPKoM-TL).

Tanba diskusaun grupu ne'e sai hanesan mós demanda ida hodi koresponde nesesidade públiku kona-ba kualidade servisu iha área Komunikasaun Sosiál, nune'e buka oinsá atu hadi'a kualidade informasaun ne'ebé habelar liuhusi meiu komunikasaun sira iha ámbitu nasionál, lokál no internasionál. (*)