“Ita boot sira hatene, ró-ahi ne'e laiha hotu ona. Kausaun milliaun $100 iha Tribunál Baukau. Prosesu la’o hela,” esplika PJR José Ximenes. 

Tekitekir, asuntu ne'e sai topíku manas iha sala reunian Parlamentu Nasionál. Deputadu Abel Pires husi Bankada Partidu Libertasaun Povu (PLP), kuriosidade tebes hakarak hatene kle'an, kona-ba prosesu julgamentu ba kazu ne'e rasik. 

Hafoin sesaun aprezentasaun relatóriu annual Ministériu Públiku remata, deputadu Pires levanta kedas kazu ne’e, hodi husu ba PJR kona-ba progresu julgamentu ba kazu ne’e.

“Ba kazu Hong Long, kazu ida agora dadauk julga hela iha Baukau. Prokuradór akuza iha ne'ebá, kona-ba krime kontra Flora-Fauna (ambiente). Akuza tiha ona,” Ximenes hatán ho diplomaisa. 

PJR mós garante, buat hotu sei la’o tuir nia faze ida-idak no depende ba kazu ida-idak ninia komplesidade. “Sasan hotu sei la’o ho fazeadamentu. Dala ruma depende ba ninia  komplesidade. Balun mai tanba kompleksu liu la’o neneik, no balun la kompleksu la’o lalais,” PJR Ximenes esplika. 

Iha ninia deklarasaun polítika, iha dia 10 Juñu liubá, deputadu Duarte Nunes husi bankada CNRT husu ba parte kompetente para halo inkeritu, investigasaun no auditoria ba kazu kompaiña Hong Long ne'ebé fó prejuizu maka'as ba estadu.

“Kazu Kompañia Hong Long Fisheries, Lda ne’ebé komesa haluha tiha de’it ona. Tinan 2017, kompañia Hong Long fó garante $100,000 hodi lori sira-nia ró-ahi sai hosi Timor-Leste. Ida ne’e ami lamenta tebes,” Nunes deklara. 

Nunes hakarak povo no entidade estadu tomak, atu iha seriedade husu responsabilizasaun ba VII Governu Fretílin ne'ebé ukun iha tempu ne'ebá kona-ba kestaun hirak ne’ebé mak fó ona prejuízu maka’as ba iha osan estado nian.

Eis Ministru Agrikultura no Peskas (MAP), Estanislau da Silva, tuir Nunes, hanesan mós kuadru FRETILIN nian, husik kompañia estranjeiru Hong Long Fisheries ne’ebé ka’er no halo exportasaun ba ikan protejidu hanesan Tubaraun. 

“Bankada CNRT deskonfia VII Governo, liuliu eis Ministru Estanislau intensionalmente hakarak husik ró-ahi hirak ne’e livre de’it. Ne'e hatudu momoos indisiu krime, ne’ebé involve eis membro VII Governo. Tanba, kolabora no komete omisaun ba kompañia Hong Long hodi ka’er ikan Tubaraun ne’ebé Timor-Leste proteje,” Nunes deklara. 

Bankada CNRT mós ejize ba Ministériu Públiku atu halo investigasaun ba eis membro VII Governo sira ne’ebé mak involve iha prosesu liberasaun ró-ahi Hong Long Fisheries Lda.