"Estadu Unidus Amérika hakarak sai parte ne'ebé lidera e ajuda iha parte aviasaun sivíl, tantu militár, nomós aviasaun sivíl, hanesan mós Austrália fó apoiu ba lidera inisiativa hodi fó apoiu, dezenvolvimentu Timor-Leste nia iha Portu Navál, iha parte forsa Navál nian, Estadu Unidus mós hakarak lidera fó apoiu maka’as iha parte aviasaun sivíl no militar”, dehan Kevin Blackstone hafoin hasoru malu ho Primeiru Ministru, Taur Matan Ruak iha Rezidénsia Farol, sesta (23/07).

Assuntu espesifikamente ne'ebé mak Primeiru Ministru, Taur Matan Ruak ho Embaixadór Amérika ne'e ko'alia kona-ba Aeroportu Baukau nomós projetu dezenvolvimentu asisténsia seguransa nian.

"Ohin loron sente onradu hasoru malu ho Primeiru Ministru, atu ko'alia kona-ba kooperasaun entre Governu Timor-Leste no Governu Estadus Unidus, espesifikamente ami ko'alia kona-ba projetu dezenvolvimentu depois serimónia iha Baukau inklui asisténsia seguransa iha Aeroportu maibé mós apoiu aviasaun sivíl”, hatete Kevin.

Kontribui ba Parte Militár nia mak Amérika sei oferese aviaun ida ba FALINTIL-Forsa Defeza Timor-Leste atu kontrola peska Ilegál sira iha tasi Timor-Leste nian.

“Atu fornese aviaun ba F-FDTL ne'e utiliza, kontrola iha tasi Timor ne'ebá, atu nune'e bele deteta atividade peska ilegál sira iha área Marrítima Timor-Leste nian”, afirma nia.

Iha parte Aeroportu Baukau Estadus unidus sei oferese sasán lubuk ida atu operasionaliza Aeroportu ne'ebé dadaun iha ona prosesu nia laran.

“Atu hadi’a lutu perímitru haleu Aeroportu Baukau ne'e, nomós fornesimentu veíkulu, ba hamosu pista, bombeiru, buat hirak ne'ebé halo atu Aeroportu funsiona, operasionaliza Aeroportu”, esplika nia

Nune'e iha aviasaun sivil ne'ebé mak oras ne'e Estadus Unidus hakarak kontribui mak liuhusi iluminasaun sira iha Aeroportu Internasional Prezidente Nicolao Lobato inklui mós Aeroportu Baukau.

“Iha projetu seluk iha parte sivíl nian, apoiu sivíl nian mak fornese iluminasaun kampu ba pista Aeroportu iha Baukau nomós iha Dili”, afirma nia. (*)