Portavóz Juventude Munisípiu Lautem, Julião Guimaraes hatete, Xefe Estadu Maior Jenerál F-FDTL,Majór Jenerál Lere Anan Timur nu'udar maubere oan ne'ebé kompremetido nia-an ba kauza ukun rasik-an durante tinan 24.

Tanba hahú husi luta ba ukun-an no nia nu'udar komisáriu politiku ba segundo jerasaun ne'ebé sei moris to’o ohin loron.

“Ami joven senti inspiradu ho Tenente Jenerál Lere Anan Timur

nia lideransa, ne’ebé nia hatudu durante ukun-an nia laran, nia sempre tane aas interesse estadu liu interesse grupu ka família sira”, dehan Juliao iha Praia dos Coqueiros, sesta (23/07).

Nune'e tempu ona atu Xefe Estadu Maior Jenerál F-FDTL, Tenente Jenerál Lere Anan Timur lidera Timor-Leste hodi garantia estabilidade governativa no dezenvolve rai ne'e ba oin.

Iha fatin hanesan Membru JML, Ventura Pino hatete, maske Xefe Estadu Maior Jenerál F-FDTL, Tenente Jenerál Lere Anan Timur sei lori pasta militár nia maibé nu'udar Juventude Munisípiu Lautém hakarak apoiu nia kandidata-an ba PR iha periódu tinan 2022-2027.

“Ami seidauk iha konversa verbal ho tenente jenerál ba kandidatura ne'e, maibé ami nu'udar JML iha inisiativa rasik no hanoin ida katak só tenente jeneral Lere Anan mak bele lori prosesu tomak ne'e ho di'ak ba dezenvolvimentu nasaun ida ne'e”, afirma nia.

Entretantu Juventude munisípiu Lautém hakarak Tenente Jenerál Lere Anan Timur kandidata-an iha eleisaun Prezidensial tinan 2022 ho independente. Maibé iha deklarasaun polítika husi partidu ruma mak suporta nia, ne'e depende. (*)