“Governu Timor-Leste hato’o ninia sentidas kondolénsias ba Governu no Povu Repúblika Populár Xina nian, hafoin estragu boot no lakon vida nian kauza husi udan boot iha loron hirak ikus ne’e iha rejiaun sentru Xina nian, ne’ebé tuir autoridade meteorolójika sira país nian, hatete katak ne’e mak udan boot forte liu iha tinan rihun ikus nian”, Ministru Prezidénsia Konsellu Ministru, Fidelis Leite Magalhães, liuhusi Komunikadu Imprensa, kinta (22/07).

Governu mós fo solidariedade ba Governu Xina hafoin hetan estragu no ema lakon vida.

“Hodi Primeiru-Ministru, Taur Matan Ruak no Governu tomak nia naran, hato’o ninia solidariedade ba Governu no povu Repúblika Popular Xina nian, ne’ebé enfrenta hela efeitu sira husi katástrofe ida-ne’e. Iha momentu difisil hirak ne’e, ami-nia pensamentu hamutuk ho vítima no sira-nia família no ami louva sira ne’ebé maka kontinua ho fiar an, hodi buka sobrevivente sira”, afirma Fidelis

Iha akontesimentu katástrofe ne'e, sidadaun Xina ema na’in-25 mak mate no na’in-hitu maka lakon iha kapitál provínsia, Zhengzhou nian, situada besik kilómetru 700 ba sudoeste Pekín nian.

Iha estimativa katak besik ema millaun ida mak afeta husi efeitu bee-sa’e no besik ema 200.000 mak evakua ona ba abrigu sira.

Udan boot ne’ebé halo bee sa’e sistema metro sidade nian, estraga estrada, veíkulu, uma no iha ospitál sira maka nakonu ho bee no laiha eletrisidade. (*)