Deputadu bankada KHUNTO, Luís Roberto hatete, dadauk Prezidente Partidu KHUNTO Armanda Berta foin mak deklara internal de'it ba militante maibé seidauk dekkara ba públiku.

“Sim atu deklara públiku ne'e seidauk, ne'e maibe ne'e internal de partidu KHUNTO ninian”, dehan nia iha Parlamentu Nasionál (PN), kinta (22/07).

Maske iha prosesu inaugurasaun sede partidu no aniversáriu partidu nian ba dala-sanulu ne'e, Armanda Berta hatete duni ba militante sira maibé ne'e deklara ho internál hodi pronunsia ba militante sira, atubele hatene.

Antes ne'e, Diretór Ezekutivu Forum Organizasaun Naun Governametál Timor-Leste (FONGTIL), Daniel Santos do Carmo hatete, Primeiru Ministru (PM), Taur Matan Ruak, tenke suspende Vise Primeira Ministra no Ministra Solidaridade Sosiál no Inkluzaun (MSSI), Armanda Berta husi nia kargu, tanba deklara-an kandidata ba Prezidente Repúblika (PR) periodu tinan 2022-2027.

“Relasiona ho señora Armanda Berta, ita-nia kestaun mak ita husu Primeiru Ministru (PM) lolos tenke suspende tanba nia halo ona deklarasaun ba públiku, nia ho razaun saida, razaun ne'e bazeia ba lei númeru 7/2016, 28 de dezembru, ne'ebé lei eleitorál ba prezidente repúblika”, dehan nia iha kna’ar fatin Kaikoli, sesta (16/07).

Maske konstituisaun la bandu sidadaun ida bainhira iha kartaun eleitorál bele ba kandidata-an maibé tenke haree mós ba artigu 7 aliñea F husi Lei númeru 7/2006, 28 dezembru kona-ba eleitorál Prezidensial.

Tanba kargu Vise Primeira Ministra no Ministra Solidaridade Sosial no Inkluzaun (MSSI) labele hasai deklarasaun ida atu nia kandidata, ne'e viola artigu 7 aliñea f.

“Sé nia asume hela hanesan vise PM, entaun ita-nia preokupasaun iha buat rua, ida mak sei perturba ninia kna’ar no segundu nia bele utiliza rekursu estadu nian hodi ba promove nia-an liuhusi servisu ne'ebé sira halo”, afirma nia. (*)