Vise Prezidente (PN), Maria Angelina Sarmento hatete, sidasaun feto no mane ne'ebé laiha responsabilidade, kontinua soe bebé iha fatin públiku, tanba menus edkuasaun husi uma-laran.

“Telemovel android ne'ebe maka labarik sira idade seidauk prontu atu uza maibe ita inan aman fasilita sira atu sira kaer telemovel ho modelu ida hanesan ne'e. E pior liu tan mak depois de ita fasilita tiha sira kaer telemovel ho teknolózia ne'ebé as, maibe ita la halo akompañamentu di'ak ba sira”, dehan nia iha Parlamentu Nasionál (PN), tersa (20/07).

Haree ba modernu ida agora ne'e mai ho teknólijia oioin, inan aman tenke hanorin oan, oinsá prevene atu labele asesu ba buat ne'ebé la merese tanba sira nia idade seidauk to'o.

Iha fatin hanesan Deputada PD, Elvina Sousa de Carvalho hatete, kazu soe bebé ne'ebé kontinua akontese ida ne'e presiza kriminaliza feto no mane ne'ebé laiha responsabiliza.

“Ha’u hanoin grupu feto Parlamentar Timor-Leste, durante ne'e halo hela advokasia no halo intervensaun maka’as ba asuntu ne'e maibé kazu soe bebé kontinua aumenta, ida ne'e ita bele dehan nu’udar fenomeno sosiál ne'ebé mak la di’ak, e entidade hotu hamutuk servisu para hodi bele kombate ida ne'e”, hatete nia iha Parlamentu Nasionál (PN), kuarta (21/7).

Haree ba kazu soe bebé ne'e, fatin balun bebé bele mate de'it, no balun sorti de'it ema hetan entaun bele salva sira tanba ne'e hanoin katak ne'e papel hothotu nian atu buka kombate.

“Papel husi Parlamentu Nasionál, husi governu nomós sosiedade sivíl, ho igreja katólika, ho ita intidade hotu tenke hasa'e konsiénsia ne'e maka’as tanba kazu ne'e husi tempu ba tempu aumenta”, dehan nia. (*)