La’ós ida ne’e de’I, PR Lú Olo mós husu ba joven sira tenke prepara a’an didi’ak hodi prontu hasoru mudansa sira iha planeta mundu ohin loron nian ne’ebé muda a’an ba bebeik hosi aspetu hotu. 

"Nu'udar Prezidente Repúblika konvida imi hodi tau matan ba mundu ne’ebé hein imi, nu’udar foin-sa’e. Mundu ida ne’ebé muda ba bebeik, ho dezafius barak, mundu ida ne’ebé lakon dadaun valor balun ne’ebé importante," dehan PR Francisco Guterres Lú Olo liuhusi diskuru ne'ebé lee husi xefe kaza sivíl iha MSSI, Sesta (26/07/2019)

Lú Olo ne’ebé sai kampeanatu ba eleisaun prezidensial iha loron 20 Marsu 2017 ne’e mós husu ba foinsa'e sira atu involve a’an direta iha área hotu-hotu.

"Foinsa’e sira tenke involve diretamente iha área hotu-hotu hanesan polítika, ekonómika no sosiál, nu’udar sofer ba nasaun nia futuru, tamba imi mak xave ba dezenvolvimentu. Estadu tenke kapasita foinsa’e sira hodi hasoru futuru iha mundu ida ne’ebé nakonu ho dezafius no mudansas," dehan PR.

Prezidente hosi munisipiu Vikéké ne’e esplika, rajaun bolu joven sira atu promove foinsa'e nia vizaun ba mudansa lideransa iha futuru nasaun nian ne'ebe atu hala'o dezenvolvimentu ida ne'ebe fokus liu ba ema nian.

"Ita tenke promove dezenvolvimentu ida ne’ebé inklui investimentu signifikativu iha área hanesan edukasaun, saúde, agrikultura, meiu –ambiente no seguransa,” nia esplika. 

Nia konsidera investimentu maka’as iha setor nesesidade baziku sira hanesan saúde, edukasaun no agrikultura sai nu’udar fator ida krusial tebes ne’ebé bele halo estadu Timor – Leste sai metin liutan. 

“Bainhira ita halo nune’e, ita haburas no hametin Demokrasia iha ita nia rain, liuhusi ideia sira ka hanoin lisuk atu hetan solusaun ba problemas ne’ebé da’et ba ita nia povu nia interese," tenik PR Lú Olo.