Koordenadór Rezidente Nasaun Unidas, Roy Trivedy hatete, Merenda Eskolar ne'e importante tanba hadi’a di'ak liután estudante sira iha área má-nutrisaun iha seguransa Alimentár.

"Merenda Eskolar importante tanba mellora akresentar nutrisaun ba labarik feto no mane sira inklui joven sira entaun serimonia ne'e mostra komitmentu ba Governu Timor-Leste atu suporta melloramentu ba populasaun iha área má-nutrisaun iha seguransa Alimentár”, dehan Roy Trivedy iha Prezidénsia Konsellu Ministru (PCM), Palásiu Governu, kuarta (14/07).

Nune'e Ministru Edukasaun Juventude no Desportu, Armindo Maia informa, estudante presiza ai-hán ne'ebé di'ak, hodi nune'e iha konsetrasaun ne'ebé di'ak iha eskola.

"Merenda Eskolar ne'e kestaun ida ne'e importante tebetebes, kuandu ita-nia kabun sira hamlaha, sira ba eskola mestre sira ko'alia mós sira la rona buat ida, balun matan dukur, entaun ida importante depois mós ho saúde”, hatete nia.

Iha ne’e, Koordenadór Rezidentes Nasõens Unidas, Roy Trivedy, Reprezentante Nasionál World Food Program (WFP), Dageng Liu, Reprezentante Organizasaun Mundiál Saúde (OMS), Arvid Mathur, Reprezentante UNICEF, Bilal Aurang Zeb Durrani, no Reprezentante FAO iha Timor-Leste, Paula Lopes da Cruz.

Antes ne'e Parseiru Internasionál  sira ne'e, oferese ona ai-hán ba kada eskola mak hanesan, fós mina, koto, no seluk ne'ebé hadi’a nutrisaun no hadi’a Saúde nian.

Iha serimonia ne'e partisipa husi Primeiru Ministru, Taur Matan Ruak, husi Parseiru Dezenvolvimentu Nasaun Unidas ho Ministru Edukasaun Juventude kona-ba deklarasaun husi koligasaun husi Merenda Eskolar, Nutrisaun, Saúde no Edukasaun ba Labarik sira. (*)