Kandidatu ne'ebé kompete iha eleisaun ne'e, José Augostinho da Costa Belo aprezenta husi Bankada Partidu Libertasaun Popular (PLP), halakon Alcino de Araújo Baris hanesan kandidatura ne’ebé aprezneta husi Bankada Frente Revolusionáriu Timor-Leste no Independente (FRETILIN).
Husi rezultadu eleisaun ne'e, kandidatu Bankada PLP nian mak konsege hetan votu 35 no kandidatu husi bankada Fretilin nian hetan de'it votu 29.
Nune'e, kandidatu ne'ebé manán eleitu ba Prezidente Komisaun Nasionál Eleisaun, José Augostinho da Costa Belo.
Hafoin anunsia rezultadu votu, Prezidente Parlamentu Nasionál, Aniceto Longuinhos Guterres Lopes hatete, pozisaun meza fó defeza no susesu ba Prezidente CNE eleitu José Agostinho Belo, atu nafatin servisu di’ak.
“Deputadu prezente 64 totál bulletin votus 64 laiha votus-nulus no laiha votu branco, kandidatu Alcino de Araujo Baris 29 votu no kandidatu José Agostinho Belo 35 votu, nune’e meza anunsia rezultadu votasaun Prezidente CNE ba periodu 17 augusto 2021 ba oin tinan lima, Prezidente CNE José Agostinho Belo, deseja bom traballu, susesu ba Prezidente foun ho Komisáriu toun ne’ebé ohin ita hili”, deklara Aniceto iha plenária PN, kuarta (14/07).
Husi prosesu ba elisaun prezidente komisaun Nasionál Eleisaun ho kandidatu na’in-rua, hetan votasaun eskrutiniu husi deputada Maria Terezinha Viegas no Deputadu Francisco David Carlos.
Liuhusi votasaun eskrutíniu sekretu, José Pedro Mariano Neves de Camões hetan votu 39 nune’e sai suplente dahuluk, Fernanda de Fátima Sarmento Ximenes, hetan votu 35 sai nu’udar suplente daruak no Querubin Jong Ferreira, hetan votu 33 nune’e sai suplentu datoluk.
Bazeia ba dekretu Prezidente Repúblika númeru 41/2021, 1 jullu, membru ne'ebé dezigna ba órgaun kompetente CNE, Prezidénsia Repúblika mós nomeia nia membru na’in-rua.
Tanba ne'e, PR nomea ona Olávio da Costa Monteiro de Almeida nu’udar membru efetivu ba CNE no Detaviana Madalena Guterres Freitas, nu’udar membru suplente.
Iha loron 9 fulan-jullu, parte governu mós nomeia Carlito Martins nu’udar membru efetivu no Elvino Bonaparte do Rêgo, nu’udar membru suplente.
Aleinde Tribunál Rekursu (TR) iha loron 30 juñu, nomeia ona membru deziganadu sira hanesan Majistradu judisiál Antonino Gonçalves hodi sai membru efetivu no João Ribeiro nu’udar suplemente.
Nune'e mós, Ministériu Públiku (MP), nomeia ona Domingos Barreto nu’udar membru efetivu no Napolião Soares da Silva nu’udar membru suplente iha loron 5 jullu 2021.
Enkuantu aprezentasaun kandidatu ba membru efetivu sira, Bankada FRETILIN propoin Alcino de Araújo Báris (atuál prezidente CNE), Bankada CNRT propoin Odete Maria Belo (atuál komisária CNE) no Bankada PLP propoin José Agostinho da Costa Belo (atuál komisáriu CNE).
Maibé kona-ba membru suplemente sira Bankada Partidu Demokrátiku (PD) propoin José Pedro Camões (advogadu), Bankada KHUNTO propoin Querubin Jong Ferreira, Bankada Frente-Mudança (FM) propoin Fátima Sarmento Ximenes, nu’udar membru Konsellu Pegagójiku no Sientífiku iha DLP, no Bankada Uniaun Demkorátika Timorense (UDT) propoin Octavio Manuel da Costa Amaral (advogadu). (*)
