"Ita-boot sira hatene, iha pakote 12, balu mak hanesan Weikalak (Kelikai), Uatulari, Laisorulai, Manatutu (Laklo), depois estrada urbana Maliana nian, no sira seluk tan ne'ebé ita haree hela Aileu (Lekidoe), puré-zemplu de'it, Aileu, Gleno. Ida ne'e pakote 12 sira ne'e mak ita halo”, informa Ministru Obras Públika (MOP), Salvadór Pires, iha Otél Novu Turízmu, tersa (13/07).
Aleinde ne'e, tékniku sira mós hahú dezeña ona ponte sira mak hanesan, Sanfu, Sana ne'ebé lokaliza iha Postu administrativu Kelikai, Komoro Mota-ulun, inklui Ponte iha Mota Maloa.
"Ponte sira ne'e ita haree hela, dezeñu sira ne'e ita haree para koordena ho ita-nia ekipa, sira atualiza prosesu ne'e tuir, atualiza sira-nia atuasaun servisu ne'ebé sira halo, liga mós ho komponente sira, ajente sira interministérial ne'ebé mak ohin ha'u mensiona ba", hatete nia.
Dadaun ne'e sei iha hela faze dezeñu ho konsultór sira, ne'ebé foin atualiza hela progresu dezeñu.
Hafoin haree tiha rezultadu husi dezeñu hirak ne'e, sei aprezenta fali ekipa Ajénsia Dezenvolvimentu Nasional (ADN) atu verifika, governu halo pagamentu hafoin lori ba halo akonsellu iha fundu administrasaun, hodi kria esbosu final.
"Ha'u espera katak, husi prosesu ne'e tomak, laiha impedimentu para ita bele avansa ona ba konstrusaun, tanba ita tama ona iha metade anu-fiskal orsamentu jerál estadu 2021. Ida ne'e mak ha'u-nia preokupasaun”, dehan nia.
Enkuantu, estrada ligasaun ba postu administrativu Laga ho Bagia, nia progresu dezeñu tama ona iha faze esbosu finál, no tinan 2021 ne’e sei loke konkursu hodi hahú ona mobiliza material ba inísia konstrusaun. (*)
