“Ida-ne’e loron istóriku ida ba fundasaun CPLP ne’ebé Timor-Leste mós inklui iha laran, ne’e previleiju boot ba ita”, dehan Branco hafoin hala'o aprovasaun votu saudasaun ba komemorasaun loron CPLP ba dala-25, iha plenária Parlamentu Nasionál (PN), tersa (13/07).
Tanba iha selebrasaun ne'e, Timoroan ida, Zacarias Albano da Costa, nu’udar diplomata ida, sei hetan tan konfiansa hodi sai Sekretáriu Ezekutivu CPLP ba periude tinan 4.
Tanba ne'e, iha opurtunidade atu divulga saida mak Timor-Leste hakarak iha komunidade ida-ne’e nia laran.
“Intermu ekonomia, komunidade CPLP bele kontribui ba nível mundiál. Ne’e ita-nia orgullu ida tanba primeira-vez sidadaun Timor-Leste simu kna’ar nu’udar Sekretáriu Ezekutivu CPLP”, dehan nia.
Maibé, membru AP-CPLP, Deputada Maria Fernnada Lay, konsidera Parlamentu Nasional faila atu promove lian portugés maske loron 17 fulan-jullu nu’udar loron istóriku ba membru CPLP tomak.
“Ha’u lamenta ho situasaun ida-ne’e, tanba ita promove patrimóniu komún língua portugueza, maibé ita la uza iha Parlamentu Nasionál ida ne’e, oinsá mak ita atu fomenta ita-nia partisipasaun,” kestiona nia.
Ba kestaun ne'e, Prezidente Parlamentu Nasionál, (PN), Aniceto Longuinhos Guteres Lopez afirma, Timor-Leste promeve lian portugés ne'e, Parlamentu Nasionál iha ona rezolusaun ida kada fulan plenária tenke uza língua portugeza maibé deputadu sira mak la uza halo didi’ak.
Maske nune'e, iha loron tersa (13/07), Parlamentu Nasionál, deside aprova votu saudasaun ba aniversáriu Comunidade dos Países de Língua Portuguesa (CPLP) dala-25 ne’ebé sei monu iha loron 17 jullu 2021, enkuantu Organizasaun CPLP ne'e ejiste iha loron 17 fulan-jullu 1996.
Aleinde Parlamentu Nasional mós aprova votu kongratulasaun ba dezignasaun Zacarias Albano da Costa nu’udar Sekretáriu Ezekutivu ba organizasaun ne’ebé sei simu toma pose iha loron 17 jullu ho rezultadu votu a-favór 53.
Pozisaun Parlamentu Nasionál hahú hala'o diskusaun no aprovasaun ba pedidu saudasaun no votu kongratulasaun tanba iha loron 14 jullu nu’udar loron ikus sesaun lejizlativa. (*)
