Sekretária Estadu ba Komunikasaun sosiál (SEKomS), Mericio Juvinal Dos Reis ‘Akara’ hatete, formasaun ne'e tenke funsiona filafali tanba formadu sira kumpri ona regra husi Organizasaun Mundiál Saúde (OMS).
“Kuaze fulan barak ita enfrenta pandemia Covid-19 entaun ita-nia formasaun la hala'o, nune'e ohin ha'u asegura katak ita-nia formasaun tenke funsiona fali, importante mak kumpri regra husi OMS, nune'e ohin ha'u haree buat hotu la'o ho di'ak liliu sira kumpri regra OMS nia”, dehan Mericio Akara, hafoin halo vizita ba formasaun iha CCI-TL ,tersa (13/07).
Iha oportunidade ida ne'e SEKomS mós informa hela ba formandu sira hodi aproveita oportunidade ida ne'e ho di'ak tanba formasaun refere ema barak mak hakarak maibé iha balun de'it mak liu iha selesaun tanba relasiona mós ba espasu.
"Ema hakarak mai ne'e barak ho númeru ne'ebé boot maibé tanba espasu ne'e naton entaun ita tenke halo selesaun, ita tenke liu kritériu balun para fó ba ema ne'ebé mak iha duni interese iha duni vontade ba área ida ne'e, ne'ebé ita konsege hetan númeru kada tuir ita-nia kondisaun, nune'e ha'u husu ba formadu sira atu aproveita oportunidade ne'e hodi di’ak”, dehan nia.
Iha fatin hanesan Koordenadór Interinu SEFTEC, Rafael da Silva Freitas hatete, planu hakarak atinje formasaun ne'e to’o iha nível haat maibé tanba relasiona ho pandemia Covid-19 entaun sira sei koko atu atinje to’o nível rua.
"Ami-nia mehi ne'e hakarak atinje to’o nível haat, maibé tanba ita hasoru hela pandemia Covid-19 entaun ami sei esforsu-an para bele to’o iha nível rua hanesan ne'e”, dehan ne’e.
Entretantu ba sira ne'ebé rejistu atu tuir formasaun ne'e hamutuk atuslima-hitunolu-resin-lima (575) maibé selesaun sira ne'ebé liu hamutuk atusrua-ruanulu-resin-lima.
Maibé tanba iha servisu balun muda entaun formandu balun tenke husik formasaun ne'e, nune'e totál ba formasaun unidade neen ne'ebé dadaun reativa mak atusrua-ruanulu
Unidade formasaun ne'ebé dadaun ne'e reativa mak, komúnidade lian Tetum jornalizmu, komunikasaun lian Portugés jornalizmu, komunikasaun relasaun públika no Protokolu, hakerek imprensa, rádiu no komunikasaun iha situasaun krize. (*)