Prezidente KRAM, Octavio Da Conceição hatete, atividade ne'e kontinuasaun husi forum diskusaun husi grupu ne’ebé mak halo ona iha semana kotuk.

“Ohin Sekretáriu Estadu Juventude Desportu liuhusi komisaun regulador Arte Marsiál marka enkontru ho Estudante sira no Diretór eskola sira, tanba semana kotuk hala’o ona enkontru ne’e ho lideransa komunitáriu nomós inan aman sira, nunee diskusaun ne'e halai liuba estudante sira, hodi oinsá sira bele hatene ezisténsia arte marsiál iha Timor-Leste no saida mak presiza governu halo para regula arte marsiál sira”, dehan Octavio iha salaun Yan Martin Balide, tersa (13/07).

Komisaun reguladór fó konvite ba ensinu superior sira iha Dili laran tomak, nomós reprezentante sira husi ensinu sekundária 5, kuaze mai hotu, no universitáriu balu la partisipa maibé reprezentante sira ne’ebé prezensa ne’e sira bele kontribui ona ba prosesu elaborasaun pakote lejislasaun ne'ebé nesesaria.

Iha fatin hanesan Diretór Eskola Sekundaria Jerál 5 De Maiu, Manuel Verdial, hatete tempu ona atubTimoroan iha nia lei hodi regula arte marsiál sira.

"Ha’u hanoin tempu to’o ona para Timoroan iha nia lei ida para regula, depois envolve ema hotu ne’ebé antes ne’e voluntáriu ona iha sira-nia grupu arte marsiál e ha’u hein katak regulamentu ne’ebé ita trata bele fó valoriza ba sira-nia grupu, grupu sira ne’e tenke akumulativu iha nia estatutu rasik, ne’ebé mak sai rekursu ba nasaun RDTL e nasaun ida ne’e valoriza sira e envolve sira iha desportivus atu nune’e fó benefisiu ba RDTL”, dehan nia.

Ho KRAM nia servisu ne’e bele konvida ema hothotu sai maun alin ida no lian ida iha atividade ida de’it, nune’e bele dignfika ba sira ne’ehotu.

Diskusaun ne’e KRAM bele elabora lei ida ne’ebé rigorozu oituan, asegura sira hotu no Lei ida ne’ebé mak hatene sira-nia estatutu no diresaun atu labele deskomfia, ema halo sala karik bele regula tuir lei. (*)