"Ba ami KHUNTO, ami na-in-lima iha ne'e, ha’u rasik xefe bankada KHUNTO, bandu atu labele ko’alia portugés iha plenária. Ko’alia tetun para ami-nia ema ne'e rona, lae ema dehan ita na’ok ten, KHUNTO lakohi”, deklara nia iha plenária PN, tersa (13/07).

Deputadu sira kuandu ko’alia portugés, ida ne'e povu bele deskonfia katak deputadu sira na’ok osan fahe ba malu, tanba ne'e sira uza lian portugés nune'e taka ba povu labele hatene.

"KHUNTO mak ha’u lakoi ida ne'e, KHUNTO hakarak ko’alia intervensaun ho lian Tetun para povu bele rona”, hatete nia.

Tanba ne'e, deputadu husi bankada sira ne’ebé hakarak promove lian portugés ne'e bele ko’alia, maibé KHUNTO sei la ko’alia membru no militante barak la hatene portugés.

"Ami-nia ema ne'e hameno mai, ama ko’alia Tetun para ami rona. Ida ne'e lei ita respeitu, fulan ida dala ida bele ko’alia, maibé ba ha’u-nia intervensaun tenke ko’alia Tetun laiha ema ida obriga ha’u tenke ko’alia portugés, tanba ha’u-nia ema ne'e hakarak Tetun”, afirma nia.

Bainhira plenária ko’alia portugés, KHUNTO mós firme atu ko’alia tanba, lian purtugés kona-ba hán hemu nian ne'e hatene hela maibé problema mak povu ki’ik sira iha terenu ladun hatene portugès.

"Problema ba povu ki’ik, sira lahatene portugés, saida mak ita atu ko’alia, liliu kona-ba orsamentu, ita kuandu desikute malu OJE ne'e osa ne'e ba iha ne’ebé tun ba ne’ebé, ita lahatene povu hanoin ita na’ok osan”, dehan nia.

Maibé, Prezidente Parlamentu Nasional (PN), Aniceto Longuinos Guteres Lopes konsidera, plenária dalaruma halo intervensaun ho lian portugés tanba konstituisaun mak fó dalan.

"A não ser ita rejeita konstituisaun ne'e la vale, entaun ita presiza konjuga buat rua ne'e hamutuk. Interese Populasaun ka eleitór sira-ninia kompriensaun ba prosesu sira ne’ebé la’o iha parlamentu, mais também interese estadu nian, ne'ebe konsagra tiha ona, e realidade aprova lei sira ne'e ita ho língua portugés”, hatete nia. (*)