Tuir Pro-reitora ba providoria no akonsellamentu (PRAPA) profesora Teresa Antónia Soares dehan, objetivu husi semináriu ida ne’e, fó hanoin ba estudante sira oinsá prosesu utilizasaun dadus iha estatístika ne'ebé ko'alia kona-ba jéneru.
“Objetivu husi workshop ne’e, atu loke ita nia hanoin kona-ba dadus estatistika jéneru. Tanba ita ko’alia kona-ba jéneru feto ho mane, dadus estatistika nia importante. Tanba, bainhira ita atu uza dadus hirak ne’e, ita halo desizaun ruma, advokasia ruma importante tebes," dehan PRAPA Tersa Antónia Soares iha Auditórium Liceu UNTL, Kinta (25/07/2019).
Nia dehan, UN Women mai, hodi habelar informasaun kona-ba dadus estatistika oinsá dadus estatistika ne’e, bele lee no bele interpreta dadus estatistika. Tanba Timor-Leste mós iha matenek barak ona, liuliu estudante sira hanesan futuru dirizente bele interpreta ho loloos.
Iha fatin hanesan reprezentante husi Head of office UN Women Timor Leste, Sunita Caminha dehan UN Women workshop ne'e realiza tanba UN Women kolobora ho Sekretariu Estadu Igualdade no Inkluzaun, Diresaun Nasional Estatistika, Ministéiru Finansas, UNFPA nomós UNTL, kona-ba estatistika jéneru ne’ebé liga mós ho Timor-Leste nia esforsu atu atinje dezenvolvimentu sustentavel.
Alende ne’e, estudante Mariana Georgina ne'ebé partisipa workshop ne'e dehan workshop ne'e ko’alia kona-ba estatistika jéneru entre feto no mane nian. No iha oportunidade ne'e, hanesan estudante bele hatene di’ak liután kona-ba dadus no estatistika hodi halo monitorizasaun ba dezenvolvimentu iha TL.
“Iha ne’e, ami mós hatene impaktu saida no fatór saida maka influénsia liubá iha feto sira kona-ba feto sira nia knaar diferensia ho mane sira," tenik Mariana.