“Ha'u nu'udár Xefx uku, durante ne'e problema ne'ebé mak hasoru iha ha'u-nia suku primeiru mak estrada. Ita ko’alia kona-ba estrada, tanba estrada mak bele fó prioridade ka fó rendimentu ekonómia ba ita-nia komunidade sira”, informa Julio Mendonça Martins iha Sede Kooperativa Cocamau Maubisse Villa, sábadu (10/07).
Tanba produtu lokal ne'ebé iha suku ne'e mak hanesan kafé, koto, modo, maek ida ne'ebé komunidade sira fa’an hodi hetan osan.
“Maibé problema estrada la asesu ba ha'u-nia komunidade e sira labele lori produtu sira ne'e ba merkadu”, haktenik nia.
Iha tinan 2018 sira hetan vizta husi Vise Ministru Obras Públika (MOP) hodi observa direta kondisaun estrada iha Aldeia Raimera, no hato'o mós sira propósta kona-ba atu hadi'a estrada.
“Iha ne'ebá sua exelénsia Vise Ministru Obras públiku promete kedan katak, ida ne'e ami sei tau ba prioridade, ninia implementasaun ne'e iha 2019, maibé to'o agora seidauk realiza iha ne'ebá”, afirma nia.
Aleinde ne'e, hasoru problema eletrisidade, iha aldeia Hebau ho populasaun hamutuk 306 mak seidauk asesu ba ahi-eletrisidade.
“Ida mós ba parte edukasaun nian, fasilidade lubuk ida mak seidauk iha, hanesan meza, kadeira, uma aprendizajen ba labarik sira ne'e, seidauk iha. Ne'e iha eskola aldeia Talale nian ne'e seidauk iha, e ba hari'is fatin mós laiha. Ida ne'e para ita-nia oan sira uza ba eskola ninian”, dehan nia.
Entretantu, Sku Edi kompostu husi Aldeia Lobibo, Rai-Mera, Tali-Felo, Talale, Demutete, Hebau, ho totál uma-kain iha 552, populasaun hamutuk 2.681, kompostu husi feto 1.352 no mane iha 1.329. (*)