“Apoiu adisionál liuhusi USAID ba ema sira ne'ebé presiza liliu sira iha área rural, rekuparasaun siklone seroja ne'ebé durasaun fulan neen (6) ho fundu dollar Amérikanu rihun-atussia (US$900.000.00) sei ajuda Governu Timor-Leste hodi fó apoiu rekoperasaun inundasaun iha Munisípiu Aileu Baukau no Manatuto”, informa Charles Blackstone iha salaun Ministru Interior, Vilaverde, sesta (09/07).
Nune'e Vise Ministru Interior, António Armindo, agradese Governu Amérika ne'ebé fó apoiu ba governu Timor-Leste maibé presiza nafatin apoiu husi nasaun no doadór seluk.
“Ami kontente tebes hodi simu bainaka espesiál Emabaixadór Amérika ho parseria sira hotu ne’ebé ohin mai iha Ministériu Interiór hala'o enkontru ida ne'e atu anúnsiu apoiu husi Governu no povu Amérika ba nasaun no povu Timor-Leste iha loron 4 fulan-abríl kuandu akontese inundasaun povu Timor-Leste sofre husi Siklone Seroja ne'ebé mak akontese”, dehan nia.
Tanba Timor-Leste presiza apoiu husi nasaun hothotu husi doadór sira atubele komplementa saida mak Governu Timor-Leste durante ne’e bele halo ona.
Entretantu Sekretáriu Estadu Protesaun Sivíl, Joaquin José Gusmão dos Reis Martins hatete, apoiu husi ajensia USAID fó hamutuk rihun-atussia liuhusi Word Vision, Mercy Corps, Caritas Diosezana de Baukau (CDB) atubele implementa programa hadi’a rekoperasaun siklone seroja.
“Ba ajuda vítima sira ne'ebé sofre durante dezastre ne'e, sira hili Munisípiu tolu Aileu, Baukau Manatuto”, informa nia.
Apoiu hirak ne'e fó rekoperasaun ba vítima ne'ebé durante ne'e afeita dezastre liliu halo toos, ortikultura, kuda tomate, mostarda hodi rekopera filafali vida ekonomia nian durante fulan neen. (*)
