"Ha'u informa ba Prezidente Repúblika, kona-ba servisu governu nian, primeiru mak kona-ba Covid e ba asuntu ida ne'e, señór Prezidente preokupa los ho variante foun Delta ne'ebé agora iha Indonézia sa'e maka’as no Prezidente husu atu tau matan nafatin ba fronteira no avansa ho vasina ne'e, e ha'u mós informa hela lala'ok vasina ba Prezidente", deklara Primeiru Ministru (PM), Taur Matan Ruak, hafoin reuniaun ho Prezidente Repúblika, Francisco Guterres 'Lú Olo', iha palásiu prezidensiál Bairopite, kinta (08/07).

Daudaun ne'e variante foun Delta besik ona odamatan Timor-Leste, tanba ne'e presiza prepara senariu ne'ebé di'ak hodi kombate wainhira variante foun ne'e invade mai Timor-Leste.

"Variante foun iha tiha ona ita-nia odamatan oin, se ita-boot sira haree ita-nia situasaun ne'e, evolusaun covid-19 iha Indonézia influénsia boot ba ita-nia situasaun rai laran, se ita-boot sira haree iha tinan ida ne'e, marsu mai oin ne'e, liliu Nusa Tengara Timur (NTT) sa'e maka’as, ita iha ne'e tama kedas ba kontajen komunitáriu”, afirma Taur.

Tanba iha Indonézia lockdown maka’as loos, entaun Timor-Leste mós tenke prevee katak, maske taka oinsá, nia bele tama, karik wainhira tama saida  mak sei halo tenke preparadu.

“Ita prepara-an ba buat aat, ba senariu pior, purezemplu iha Indonézia no Índia presiza oksijen, tama mai iha ne'e ita-nia reasaun oinsá, naturalmente ita tenke infrenta, tanba ne'e mak ha'u-nia apelu ba sidadaun sira hotu, ita tenke prepara-an ba senariu pior liu. Klaru ita kontente vasinasaun la'o di'ak, rezultadu Covid iha Dili no fatin seluk komesa tun maibé ita mós labele halo festa uluk wainhira  buat ne'e sei la'o hela", dehan nia.

Governu sei haree medida oinsá, naturalmete Indonézia sei lockdown, Jakarta, Bali, NTT, lockdown hotu, pelu faktu sira lockdown hotu ida ne'e di'ak ba Timor-Leste.

"Ita iha tempu badak ita sei haree, atu halo nusa mak taka fronteira ne'e", hakotu nia. (*)