“Aprova ona mós projetu Dekretu-Lei kona-ba apoiu estraordináriu ba insersaun iha merkadu serbisu ba benefisiáriu sira husi programa “traballu kontra remunerasaun”, (cash for work) ne’ebé aprezenta husi Ministru Finansas, Rui Augusto Gomes”, informa Ministru Prezidente Konsellu Ministru, Fidelis Leite Magalhães, iha palaiu Governu, kuarta (07/07).
Tanba ne’e, atu permite katak programa “traballu kontra remunerasaun” bele iha impaktu kleur liután, hodi promove traballadór hirak ne’e ba-iha merkadu traballu, husi insentivu ba ninia kontratasaun liuhusi apoiu finanseiru ba empreza no traballadór sira.
Programa sira ne’e kria ona atu ajuda ba esforsu limpeza no rekonstrusaun ho utilizasaun ba maundeobra, iha tempu hanesan atu desponibiliza fonte rendimentu ida ba traballadór rihun ba rihun ne’ebé laiha servisu.
Husi apoiu sira estraordináriu ne’ebé kria diploma ne’e hanesan ho ria husi Orsamentu Suplementár ba jeneralidade traballador sira nian.
“Subsídiu estraordináriu ba insersaun iha merkadu traballu ne’e atribui ba entidade empregadora sira ne’ebé selebra kontratu, válidu ba períodu mínimu fulan neen ho partisipante iha “traballu kontra remunerasaun”. Montante subsídiu ne’e maka 70% husi saláriu traballadór nian. Dispensa parsiál husi dever pagamentu kontribuisaun sira ba Seguransa Sosiál, husi empreza no husi traballadór. No Subsídiu estraordináriu dezempregu nian, ho valór 40% husi remunerasaun normál ba eskalaun dahuluk ne’ebé hanesan baze insidénsia kontributiva ba seguransa sosiál iha adezaun fakultativa”, esplika Fidelis.
Apoiu hirak ne’e sei implementa husi Institutu Nasionál ba Seguransa Sosiál ho koordenasaun ho Sekretáriu Estadu Formasaun Profesionál no Empregu (SEFOPE) no sei finansia husi fundu COVID-19. (*)